तिरुवनन्तपूरम / मुंबई : काल रात्री मुंबईत स्फोटके सापडल्याने खळबळ उडालेली आहे. आता केरळमध्ये आज शुक्रवारी सकाळी कोझिकोड रेल्वे स्थानकावर मोठ्या प्रमाणावर स्फोटके सापडली आहेत. चेन्नई-मंगळुरू सुपरफास्ट एक्सप्रेसमध्ये ११७ जिलेटीन स्टिक आणि ३५० डिटोनेटर सापडले. चेन्नईतील एका महिलेच्या सीट खाली स्फोटकांचा साठा सापडला आहे. मात्र, ताब्यात घेण्यात आलेल्या महिलेनेच ही स्फोटके आणली होती का? हे स्पष्ट झालेले नाही.
मुंबईत काल रात्री स्फोटकं सापडल्याच्या घटनेला २४ तासही होत नाहीत तोपर्यंत आता आणखी एका राज्यात स्फोटके सापडली आहेत. केरळमध्ये आज सकाळी कोझिकोड रेल्वे स्थानकावर मोठ्या प्रमाणावर स्फोटक सापडली आहेत. कोझिकोड स्टेशनवर चेन्नई-मंगळुरू सुपरफास्ट एक्सप्रेसमध्ये ११७ जिलेटिन स्टिक आणि ३५० डिटोनेटर सापडले आहे.
* महिलेकडून साठा जप्त
चेन्नईतील एका महिलेकडूनही स्फोटकं ताब्यात घेण्यात आली असून एवढ्या मोठ्या प्रमाणावर स्फोटकांचा साठा जप्त करण्यात आल्याने एकच खळबळ उडाली आहे. मिळालेल्या माहितीनुसार, प्रवास करणाऱ्या एका महिलेच्या सीट खाली स्फोटकांचा साठा सापडला आहे. ही महिला चेन्नईहून थालास्सेरीकडे जात होती.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
मात्र, ताब्यात घेण्यात आलेल्या महिलेनेच ही स्फोटकं आणली होती का? याबाबतच्या वृत्ताला कुणीही दुजोरा दिलेला नाही. ही स्फोटकं या महिलेने आणली की इतर कुणी तिच्या सीट खाली ठेवली याचा पोलीस शोध घेत आहेत. पोलीस या महिलेची कसून चौकशी करत आहे. चौकशीअंतीच पोलिसांकडून याबाबतची अधिकृत माहिती देण्यात येणार आहे.
* गुन्हे शाखेचे ८ ते १० पथके तैनात
मुंबईत काल मुकेश अंबनी यांच्या मुंबईतील बंगल्यासमोर एक अनोळखी कार संशयास्पदरित्या पार्क करण्यात आली होती. ही बाब समोर आल्यानंतर यथे बॉम्ब स्कॉड पथक, एसएसजी कमांडो तसेच मुंबई सह पोलीस आयुक्त विश्वास नांगरे पाटीलही घटनास्थळी दाखल झाले होते. बॉम्ब नाशक पथकाने या गाडीची तपासणी केली असता त्यामध्ये २० जिलेटीनच्या कांड्या तसेच एक निनावी पत्रही आढळले होते. या पत्रामध्ये ‘ही फक्त झलक आहे’ अशा आशयाचा मजकूर लिहलेला असल्याचे समोर आले होते. त्यानंतर ही घटना समोर आल्यानंतर संपूर्ण मुंबई काही काळासाठी धास्तावली होती.
दुसरीकडे अंबांनींच्या घराबाहेर स्फोटकांनी भरलेली गाडी पार्क करणाऱ्यांचा शोध घेण्यासाठी मुंबई पोलीस कसून कामाला लागले आहेत. याप्रकरणाचा तपास सध्या गुन्हे शाखेकडे आहे. गुन्हे शाखेकडून या लोकांना शोधण्यासाठी ८ ते १० पथके तैनात करण्यात आली आहे. पोलिसांनी मुकेश अंबानी यांच्या घराबाहेरील सीसीटीव्ही फुटेज ताब्यात घेतले असून त्याची पाहणी सुरु आहे. मुंबईच्या पूर्व द्रुतगती महामार्गावर मुंबई पोलिसांकडून नाकाबंदी करण्यात आली आहे. मुंबईच्या इतर भागांमध्येही नाकांबदी करुन वाहनांची कसून तपासणी केली जात आहे. याशिवाय, अनेक हॉटेल्स, ढाबा आणि लाँजमध्ये जाऊन पोलिसांची पथके चौकशी करत आहेत.