मोहोळ / चिखली : मोहोळ तालुक्यातील शेटफळ येथे होत्याचे नव्हते झाले. खेळता खेळता खेळ झाला. तीन मुले शेततळ्यात बुडून त्यांचा मृत्यू झाला आहे. आई वडिलांचा काळीज भेदणारा हंबरडा ऐकून गावकरीही गहिवरले. आई – वडील पोटापाण्यासाठी बाहेर गेल्यावर ही दुर्दैवी घटना घडली. Solapur: While playing, the game was over, three little children drowned in the field.Mohol Shetfal
पोटाची खळगी भरण्यासाठी आईवडील भर उन्हात दुसऱ्यांच्या शेतात राबण्यासाठी गेलेले, घरी लहान लहान मुलेच राहिलेली, शेवटी ती लहानच. घरात खेळणारी ती मुलं अंगणात आली. अंगणातून खेळता खेळता शेततळ्याकडे गेली. खाली जमीन तापलेली, वर सूर्य कोपलेला. अशावेळी साहजिकच मुलांनी शेततळ्यातील पाण्यात पाय सोडून खेळणे पसंद केले. खेळता खेळता कधी आणि कुणाचा पाय घसरला कळले नाही. जेव्हा संध्याकाळी मुलांना शोधत शोधत आई तळ्याकडे आली, त्यावेळी तळ्यातील पाण्यात तिघांचेही मृतदेह तरंगताना दिसले आणि आईने हंबरडा फोडला.
हा प्रकार घडला आहे शेटफळ (ता. मोहोळ) येथील डोंगरे यांच्या शेतात. विनायक भरत निकम (वय ११), सिध्दार्थ भरत निकम (वय ८) आणि कार्तिक मुकेश हिंगमिरे (वय ५) अशी या घटनेत मृत्युमुखी पडलेल्या चिमुकल्यांची नावे आहेत. झाले असे की, मृत विनायक, सिध्दार्थ व कार्तिक हे एकमेकांचे आतेभाऊ आणि मामेभाऊ आहेत. यांचे आईवडील हे मोलमजुरी करून उदरनिर्वाह भागवतात.
https://www.facebook.com/109399567404448/posts/537692577908476/
स्थानिक, देशासह जगभरातल्या बातम्या वाचण्यासाठी ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वर आवर्जून द्या भेट…
सध्या उन्हाळ्याचे दिवस असल्यामुळे आईवडील सकाळी लवकरच कामाला निघून गेले होते. ही तिन्ही मुली ही घरीच होती. या घटनेची नोंद मोहोळ पोलिसात झाली असून याचा अधिक तपास पोलीस हवालदार आदलिंगे हे करीत आहेत.
□ खेळता खेळता खेळ झाला
तिघेही लहानच. म्हणजे खेळत्या वयाचे. घरात खेळणारी मुले अंगणात आली. अंगणातून ती कधी शेतात गेली कोणाला कळलेच नाही. जेव्हा शेततळ्याजवळ गेली, तेव्हा सूर्य डोक्यावर आग ओकत होता. त्यामुळे साहजिकच ही मुले गारव्यासाठी म्हणून शेततळ्याच्या काठावर बसून पाण्यात पाय सोडून खेळू लागली. खेळता खेळात ती पाण्यात पडली आणि त्यांच्या जीवनाचा खेळ होऊन बसला, असे गावकऱ्यांमध्ये बोलले जात होते.
□ काळीज भेदणारा हंबरडा
मृत विनायक आणि सिध्दार्थ याचे वडील भरत निकम हे मूळचे माचणूर (ता. मंगळवेढा) चे आहेत. शेटफळ ही त्यांची सासुरवाडी. मोलमजुरी करून उदरनिर्वाह करण्यासाठी म्हणून ते पत्नी रेश्मा व मुलांसह माचणूर सोडून शेटफळला आले होते. पोटाची खळगी भरण्यासाठी म्हणून ते दुसऱ्यांच्या शेतात मजुरीला गेले आणि इकडे पोटची दोन्ही मुले पाण्यात बुडून मरण पावली. पोट भरता भरता पोटची दोन्ही मुले जिवानिशी गेल्यामुळे त्यांच्या माऊलीचा हंबरडा उपस्थितांचे काळजी भेदून जात होता.
□ चप्पल दिसली अन् काळीज चर्रर्र झालं…
दिवसभरातील मोलमजुरीचे काम संपवून सायंकाळच्या सुमारास आईवडील घरी आले. तेव्हा मुले घरात नव्हती. इकडे तिकडे कुठेतरी खेळायला गेली असतील म्हणून सुरुवातीला कानाडोळा केला. मात्र बऱ्याच वेळेनंतरही मुले घरी आली नाहीत म्हणून शोधाशोध सुरू झाला. शेजारीपाजारी पाहून झाले, इतर मुलांनाही विचारून पाहिले. पण मुलांचा ठावठिकाणा लागेना. जेव्हा शोधत शोधत शेततळ्याकडे गेले; तेव्हा शेततळ्याजवळ एका मुलाची चप्पल दिसली. म्हणून बांध चढून जाऊन शेततळ्यात पाहिले आणि काळीज चर्रर्र झालं.
https://www.facebook.com/109399567404448/posts/537282474616153/
