लाचखोरी प्रकरणी ग्रामविकास अधिकाऱ्यासह तिघांना पाच वर्षे सक्तमजुरी

सोलापूर : घरकुलचा हप्ता मिळण्यासाठी पंचायत समितीला अहवाल पाठविण्याकरिता २५ हजार रुपयांची लाच स्वीकारल्याप्रकरणी मोहोळ तालुक्यातील टाकळी सिकंदर येथील तत्कालीन ग्रामविकास अधिकाऱ्यांसह तिघांना न्यायालयाने प्रत्येकाला पाचवर्षे सक्तमजुरी व चार हजार रुपये दंडाची शिक्षा ठोठावली. Five years of hard labor for Mohol Solapur along with village development officer in bribery case

टाकळी सिकंदर येथील तत्कालीन ग्रामविकास अधिकारी गोपीचंद दादा गवळी, तत्कालीन सरपंच नवनाथ तुळशीराम अनुसे व तत्कालीन ग्रामपंचायत कर्मचारी मोहम्मद कचरोद्दीन पठाण अशी शिक्षा ठोठावण्यात आलेल्या आरोपींची नावे आहेत. जुलै 2012 मध्ये मंजूर झालेल्या घरकुलाचा दुसरा व तिसरा हप्ता मिळण्यासाठी पंचायत समिती मोहोळ या ठिकाणी अहवाल पाठवण्यासाठी आरोपींनी 25 हजार रुपयांच्या लाचेची मागणी केली होती.

त्यामुळे तक्रारदाराने लाचलुचपत प्रतिबंधक खात्याकडे संपर्क साधून तक्रार दिली होती. त्यानुसार पथकाने लाचेचा सापळा लावला होता. त्यावेळी तिघांना लाच स्वीकारल्यानंतर पकडण्यात आले होते. या प्रकरणी तिन्ही आरोपींविरुद्ध मोहोळ पोलीस ठाण्यात गुन्हा दाखल करण्यात आला होता.

या गुन्ह्याचा तपास तत्कालीन पोलीस उपअधीशक गणेश जवादवाड यांनी करून विशेष न्यायालयात दोषारोपपत्र दाखल केले होते. त्याची सुनावणी न्यायाधीश आर. एन. पांढरे यांच्यासमोर झाली होती. दोन्ही बाजूंचा युक्तिवाद ऐकून न्यायाधीशांनी तिन्ही आरोपींना वेगवेगळ्या कलमान्वये दोषी धरून पाचवर्षे सक्तमजुरी व चार हजार रुपये दंडाची शिक्षा ठोठावली. यात सरकारतर्फे ॲड. अल्पना कुलकर्णी तर आरोपींतर्फे ऍड राहुल खंडाळ, अँड निलेश जोशी, ऍड व्ही. पी. शिंदे यांनी काम पाहिले.

स्थानिक, देशासह जगभरातल्या बातम्या वाचण्यासाठी ‘सुराज्य डिजिटल’ फेसबुक पेज, डेलिहंट, ट्विटर, कू ॲपवर आणि ‘टेलिग्राम’वर आवर्जून द्या भेट…(बातमीसाठी मोबाईल – 9881192310 व्हाटसअपवर संपर्क करा)