गडचिरोली., 23 मे (हिं.स.)। महाराष्ट्र-छत्तीसगड सीमेवर नुकत्याच स्थापन केलेल्या कवंडे पोलिस स्टेशन हद्दीत काही माओवादी दबा धरून बसले असल्याच्या विश्वासार्ह माहितीच्या आधारे पोलिसांनी केलेल्या कारवाईत 4 जहाल माओवाद्यांना कंठस्नान घालण्यात यश आले आहे.
अतिरीक्त पोलिस अधीक्षक एम. रमेश यांच्या नेतृत्वाखात १२ सी ६० पथके (३०० कमांडो) आणि सीआरपीएफची एक तुकडी गुरुवार २२ मे रोजी दुपारी कवंडे आणि नेलगुंडा येथून इंद्रावती नदीच्या काठावरील परिसरात मुसळधार पावसादरम्यान रवाना करण्यात आल्या होत्या. त्यानंतर आज, शुक्रवारी सकाळी या परीसरामध्ये पोलिस पथक शोध मोहीम राबवत असताना माओवाद्यांनी सी-६० जवानांवर अंदाधुंद गोळीबार सुरू केला.
ज्याला पोलिस पथकाने प्रभावी प्रत्युत्तर दिले. जवळजवळ दोन तास अधूनमधून गोळीबार सुरू होता. यानंतर पोलिस पथकाने परिसरात शोध मोहीम राबवल्यानंतर ४ जहाल माओवाद्यांचे मृतदेह, एक स्वयंचलित सेल्फ लोडिंग रायफल(SLR), दोन ३०३ रायफल आणि एक भरमार आढळल्या. याशिवाय, घटनास्थळावरून वॉकी टॉकी, छावणी साहित्य, नक्षलवादी साहित्यही जप्त करण्यात आले आहेत.उर्वरित माओवाद्यांच्या शोधासाठी परिसरात शोध मोहीम सुरू आहे.
—————
