नवी दिल्ली, 29 जुलै – भारताने अलीकडेच राबवलेल्या ‘ऑपरेशन सिंदूर’ अंतर्गत शत्रू देशाच्या हद्दीत 100 किलोमीटर आत घुसून केलेल्या कारवाईत 9 दहशतवादी तळं उद्ध्वस्त करण्यात आली आणि 100 हून अधिक दहशतवाद्यांचा खात्मा झाला आहे, अशी माहिती केंद्रीय गृहमंत्री अमित शहा यांनी लोकसभेत दिली.
शहा म्हणाले की, “ही कारवाई केवळ दहशतवाद्यांविरोधात होती. मात्र पाकिस्तानने ती स्वतःवर हल्ला असल्याप्रमाणे पाहिली आणि त्यांच्या लष्कराने दहशतवाद्यांच्या अंत्ययात्रेला खांदा दिला – हे जगाने पाहिले आहे.”
विरोधकांच्या टीकेला उत्तर
विरोधी पक्षांकडून संघर्षविरामाच्या पार्श्वभूमीवर सरकारच्या भूमिकेवर प्रश्न उपस्थित करण्यात आला. “जर आपण चांगल्या स्थितीत होतो, तर युद्ध का केले नाही?” या प्रश्नाला उत्तर देताना शहा म्हणाले, “युद्धाचे अनेक दूरगामी परिणाम असतात. त्याबाबत निर्णय विचारपूर्वक घ्यावा लागतो.”
त्यांनी 1948 च्या युद्धाची आठवण करून देत, “नेहरूंच्या निर्णयामुळेच पीओके (पाकव्याप्त काश्मीर) अस्तित्वात राहिला,” असा आरोप केला. तसेच, सिंधू जल करार, 1965 च्या युद्धानंतर हाजी पीरचा परतावा आणि 1971 चा शिमला करार यासारख्या ऐतिहासिक घडामोडींवरून काँग्रेसवरही निशाणा साधला.
‘ऑपरेशन सिंदूर’ अंतर्गत नष्ट करण्यात आलेले दहशतवादी तळ:
-
बहावलपूर – मरकज शुभानअल्लाह
-
मुरीदके – मरकज तैयबा
-
सियालकोट – मेहमूना जोया कॅम्प, सरजल कॅम्प
-
मुजफ्फराबाद – सवाईनाला, सैयदना बिलाल कॅम्प
-
कोटली – गुलपूर अब्बास कॅम्प
-
भीमबर – बरनाला कॅम्प
शहा यांनी स्पष्ट केले की या कारवाईत एकाही सामान्य नागरिकाला इजा झाली नाही, केवळ दहशतवादी लक्ष्य केले गेले.
पाकिस्तानच्या प्रत्युत्तराची माहिती:
-
पाकिस्तानकडून काही भारतीय लष्करी तळांवर हल्ल्याचा प्रयत्न झाला.
-
भारतीय लष्कराला कोणतीही जीवितहानी झाली नाही.
-
एका गुरुद्वारा आणि मंदिराचे आंशिक नुकसान झाले.
-
काही सामान्य नागरिक किरकोळ जखमी झाले.
एअरबेसवरील प्रतिहल्ला
शहा यांनी सांगितले की भारताने पाकिस्तानच्या 11 एअरबेसवर लक्ष्य साधले, यामध्ये 8 तळांवर मोठे नुकसान झाले आहे.
शेवटी, गृहमंत्र्यांनी सांगितले की, “ऑपरेशन सिंदूरमुळे पाकिस्तानमध्ये चालणाऱ्या राज्यपुरस्कृत दहशतवादाचा जागतिक स्तरावर पर्दाफाश झाला आहे.”
