मुंबई : दुर्मिळ आजाराने ग्रस्त असलेल्या ५ महिन्याच्या चिमुकल्या तीरा कामतसाठी केंद्र सरकारने पुढाकार घेतला आहे. तीरासाठी लागणाऱ्या औषधावरील ६ कोटी रुपयांचे आयात शुल्क व जीएसटी माफ करण्यात आले आहे. तीरावर मुंबईत उपचार सुरू आहेत. तीराच्या उपचारासाठी लागणारे इंजेक्शन १६ कोटी रुपयांचे असून ते अमेरिकेतून मागविले जाणार आहे. तीराच्या आई- वडिलांनी क्राऊड फंडिगच्या माध्यमातून १६ कोटी रुपये उभारले.
मुंबईतील एका पाच महिन्यांच्या बालिकेच्या उपचारासाठी आवश्यक औषधी अमेरिकेतून आयात करण्यासाठी लागणारे सर्व कर माफ करण्याचा निर्णय केंद्र सरकारने घेतला आहेत. तातडीने हा निर्णय घेतल्याबद्दल माजी मुख्यमंत्री आणि विधानसभेतील विरोधी पक्षनेते देवेंद्र फडणवीस यांनी पंतप्रधान नरेंद्र मोदी यांचे आभार मानले आहेत. यासंदर्भात माहिती फडणवीस यांनी पत्राचा फोटो पोस्ट करत दिली आहे.
तिरा कामत या मुंबईतील पाच महिन्यांची बालिकेला जीन रिप्लेसमेंट उपचारांची नितांत गरज आहे. तिच्या या उपचारांसाठी लोकांनी क्राऊड फंडींगच्या माध्यमातून मोठ्या प्रमाणात योगदान दिले आहे. क्राऊड फंडींगच्या माध्यमातून सुमारे १६ कोटी रूपये गोळा करण्यात आले आहेत. पुढील उपचारासाठी ‘झोलजेन्स्मा’ हे औषध अमेरिकेतून भारतामध्ये आयात करावे लागणार होते. मात्र हे औषध भारतात आणण्यासाठी जीएसटी, कस्टम करांसह सुमारे साडेसहा कोटी रूपये आणखी खर्च येणार होता. त्यामुळे पालकांनी त्यातून सूट मागण्यासाठी देवेंद्र फडणवीस यांच्याकडे पाठपुरावा केला.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
पालकांच्या मागणीनंतर तिरा कामतच्या उपचारासाठी अमेरिकेतून मागवण्यात येणाऱ्या औषधाला करांतून सूट मागण्यासाठी देवेंद्र फडणवीस यांनी एक फेब्रुवारी रोजी पंतप्रधान नरेंद्र मोदी यांना पत्र पाठवून त्यासंबंधीची विनंती केली. पंतप्रधान नरेंद्र मोदी यांनी निर्देश देताच, तातडीने त्यावर कार्यवाही झाली आणि त्यानुसार, मंगळवारी नऊ फेब्रुवारीला या औषधीपुरता सर्व कर माफ करणारा आदेश वित्त विभागाने जारी केला.
* पंतप्रधानांचे आभार
पंतप्रधानांनी अतिशय संवदेनशीलतेने पुढाकार घेत त्वरेने कारवाई केल्यामुळे निश्चितपणे तिरा कामत हिचे प्राण वाचतील असा विश्वास फडणवीस यांनी व्यक्त केला आहे. तसेच या प्रकरणामध्ये तातडीने लक्ष घातल्याबद्दल पंतप्रधान नरेंद्र मोदी यांचे आभार सुद्धा मानले आहेत. तिरा कामत हिला उत्तम आरोग्य आणि दीर्घायुष्य लाभो, अशा शुभेच्छाही फडणवीस यांनी दिल्या आहेत. या करमाफीमुळे तिरावरील उपचारांचा खर्च मोठ्या प्रमाणात वाचणार असून तिच्या पालकांना या निर्णयामुळे मोठा दिलासा मिळाला आहे.
* प्रत्यक्षात औषध येण्यासाठी १५ दिवसाचा कालावधी
प्रत्यक्षात औषध भारतात येण्यासाठी आणखी १५ दिवसांचा कालावधी लागणार आहे. सध्या तीरा तिच्या अंधेरी येथील घरी असून पोर्टेबल व्हेंटिलेटरवर उपचार घेत आहे. तीराच्या पालकांच्या म्हणण्यानुसार, तिची तब्बेत स्थिर असून लवकरात लवकर तिला औषधे मिळावीत यासाठी आम्ही आणखी प्रयत्न करत आहोत. तीराचा रक्ताचा एक अहवाल नेदरलँडवरून येणे बाकी असून तो दोन – तीन दिवसांत येईल. तो एकदा का अहवाल आला की, तीराचा औषध मिळण्याचा मार्ग सुकर होणार आहे.
