तामिळनाडू : कांचीपूरम भागात अभिनेते आणि मक्कल निधी मय्यम पक्षाचे नेते कमल हासन यांच्या गाडीवर एका व्यक्तीनं हल्ला केल्याचं वृत्त आहे. काल रविवारी रात्री ही घटना घडल्याचं वृत्त आहे.
कांचीपुरममध्ये प्रचारानंतर आपल्या हॉटेलकडे जात असताना एका तरुणानं हासन यांच्या गाडीवर कथितरित्या हल्ला केला. हल्ला करणार तरुण कमल हासन यांचा फॅन असल्याचं सांगितलं जातंय.
पक्षाच्या नेत्यांनी दिलेल्या माहितीनुसार, या हल्ल्यात हासन यांना कोणतीही इजा झालेली नाही. परंतु त्यांच्या गाडीचं मात्र नुकसान झालंय. आरोपीनं कमल हासन यांच्या गाडीचा दरवाजा जबरदस्तीनं उघडण्याचा प्रयत्नही केला.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
तामिळनाडू विधानसभा निवडणुकीत मक्कल निधी मय्यम पक्षानं १५४ मतदारसंघांतून आपले उमेदवार निवडणुकीच्या रिंगणात उतरवले आहेत. खुद्द कमल हासन कोयम्बतूर दक्षिण मतदारसंघातून निवडणूक लढत आहेत.
तामिळनाडू विधानसभेच्या २३४ जागांवर एकाच दिवशी म्हणजेच ६ एप्रिल रोजी मतदान होणार आहे. तर निवडणुकीचा निकाल इतर राज्यांसोबत अर्थात २ मे रोजी जाहीर होणार आहे. राज्यात सत्ताधारी एआयएडीएमके भाजप आणि पीएके सोबत आघाडीत आहे.
* हल्लेखोराला घेतले ताब्यात
आरोपी तरुणाला पकडून पोलिसांच्या ताब्यात दिलंय. आरोपी दारुच्या नशेत होता, असं सांगितलं जातंय. हासन यांच्या गाडीवर अचानक झालेल्या हल्ल्यानंतर कार्यकर्त्यांनी या तरुणाला पकडून त्याची चांगलीच धुलाईही केली. त्यानंतर पोलिसांनी त्याला ताब्यात घेऊन उपचारासाठी आणि तपासणीसाठी रुग्णालयात नेलं.
