पंढरपूर : कोणतीही वैद्यकीय पदवी नसताना वैद्यकीय व्यवसाय करणाऱ्या पंढरपूर तालुक्यातील तुंगत येथील डॉक्टरवर कारवाई करण्यात आली असून त्याच्या विरोधात पोलीसात गुन्हा नोंदवण्यात आला आहे.
तालुका आरोग्य अधिकारी डॉ. एकनाथ बोधले यांनी ही कारवाई केली. बोगस डॉक्टराची शोध मोहिम राबवण्यात येत असून तुगंत गावात रॉय बिवास बिरेन (वय ३८ रा. पं. बंगाल) हा व्यक्ती कोणतीही वैद्यकीय पदवी नसताना रुग्णावर औषधोपचार करत असल्याच कारवाई वेळी आढळून आलं. यावेळी या पथकाला गावातील एस.टी. स्टँडजवळ खंडेराव उत्तम रणदिवे यांच्या मालकीच्या खोलीत संबंधित डॉक्टर मिळून आला. चौकशीअंती त्याचे नाव रॉय बिवास बिरेन (वय ३८, रा. घाट पातीला, ता.वनगाय, जि. चोवीस परणाना, पश्चिम बंगाल, सध्या रा. तुंगत) असे आहे.
गेल्या सात वर्षापासून अवैधरीत्या वैद्यकीय धंदा करून तुंगत (ता. पंढरपूर) व आजूबाजूच्या गावातील ग्रामस्थांच्या जिवास धोका निर्माण करणाऱ्या बोगस डॉक्टरावर उपविभागीय पोलीस अधिकारी विक्रम कदम व तालुका आरोग्य अधिकारी डॉ. एकनाथ बोधले यांनी बुधवारी कारवाई केली. त्याच्याकडे कोणत्याही प्रकारचे नोंदणी प्रमाणपत्र आढळले नाही.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
पथक पोहोचले तेव्हा त्या रुग्णालयात एक महिला रुग्णाला सलाईन लावलेले होते. रुग्णाला औषध उपचारासाठी डायक्लो फॅनिक, डेम्जा मिर्थेसॉन व अन्य औषधे त्याच्याजवळ आढळून आली. तपासादरम्यान गेल्या सात वर्षांपासून तो रुग्णांवर उपचार करीत असल्याचे ग्रामस्थांनी सांगितलेेे.
तपासणी पथकाने संबंधित डॉक्टर ज्या पॅथीचे उपचार करतो त्याचे वैद्यकीय प्रमाणपत्र तसेच महाराष्ट्र मेडिकल प्रॅक्टिशनर ॲक्ट १९६१ किंवा इंडियन मेडिकल कौन्सिल ॲक्ट १९६५ अंतर्गत नोंदणी प्रमाणपत्राबाबत विचारले. त्याच्या दवाखान्यामध्ये दर्शनी भागावर कोठेही नोंदणी प्रमाणपत्र लावले नव्हते. त्याबाबत विचारणा केली असता त्याने कोणतेही प्रमाणपत्र नसल्याचे सांगितले.
गावकऱ्यांसमोर या घटनेचा पंचनामा करण्यात आला. दवाखान्यात सापडलेली औषधे व खरेदी केलेल्या औषधांची बिले पाहता ते मॉडर्न मेडिसीन म्हणजे ॲलोपॅथीचा व्यावसाय करत असल्याचे दिसून आले. मात्र असा व्यवसाय करण्यासाठी लागणारे वैद्यकीय पदवी व नोंदणी प्रमाणपत्र त्यांच्याकडे मिळून आले नाही. यामुळे त्यांच्या विरोधात इंडियन मेडिकल कौन्सिल ॲक्ट १९५६चे कलम १५(२) व महाराष्ट्र मेडिकल प्रॅक्टिशनर ॲक्ट १९६१ चे कलम ३३ (२) नुसार तसेच भादवि कलम ४१९, ४२० प्रमाणे गुन्हा नोंदला आहे.
