बारामती : कॅन्सर झालेल्या रुग्णास कॅन्सर बरा करतो, असे सांगून बारामती शहरातील एकाची २ लाख ५१ हजार ५०० रुपयांची फसवणूक केल्याप्रकरणी अटक करण्यात आलेल्या आरोपी मनोहर उर्फ मामा भोसलेला (वय 39, रा. उंदरगाव, ता. करमाळा, जि. सोलापूर) यास अतिरीक्त व जिल्हा सत्र न्यायाधीश डी.एन. गिऱ्हे यांनी १६ सप्टेंबरपर्यंत पाच दिवसांची पोलीस कोठडी सुनावली आहे.
त्याला सायंकाळी उशीरा बारामती तालुका पोलिस ठाण्यात आणण्यात आले. आज (शनिवार) सुट्टीच्या न्यायाधिशांपुढे त्याला हजर करण्यात आले. न्यायालयाने त्याला पाच दिवस पोलिस कोठडीत ठेवण्याचे आदेश दिले. भोसले याच्या अन्य दोन साथीदारांना अद्याप अटक करायची आहे, गुन्ह्यात घेतलेली रक्कम व वापरलेले वाहन जप्त करायचे आहे.यासह अन्य बाबींवर तपास करणे बाकी असल्याने पोलिस कोठडीची मागणी सरकारी वकिलांकडून करण्यात आली. तर भोसले यांना अटक करताना सर्वोच्च न्यायालयाच्या निर्देशाचे पालन झालेले नाही.
शशीकांत खरात (रा.साठेनगर, कसबा बारामती, ता बारामती. जि पुणे) यांनी बारामती ग्रामीण पोलीस ठाण्यात तक्रार दिली आहे. त्यानुसार तक्रारदार खरात यांच्या वडीलांना थायरॉईड कॅन्सर हा दुर्धर आजार झाला आहे. त्यामुळे खरात हे मनोहरमामा भोसले भोंदुबाबाच्या मौजे सावंतवाडी, गोजूबावी (ता. बारामती जि. पुणे ) मठामध्ये गेले. त्याने तो बाळूमामा यांचा अवतार असल्याचा बनाव केला.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
तक्रारदार यांच्या वडिलांचा गळ्यावरील थायरॉईड कॅन्सर बरा करतो, असे सांगून त्यावरील औषध म्हणून बाभळीचा पाला, साखर, भंडारा खाण्यास दिले. तसेच विशाल वाघमारे उर्फ नाथबाबा व ओंकार शिंदे यांच्यासोबत संगनमत करून वेळोवेळी चढावा, अभिषेक व भेटीसाठी त्यांचेकडून एकुण २,५१,५००/- रुपये त्यांचे व त्यांचे वडीलांचे जिवाचे बरे वाईट होईल अशी भीती घालून देण्यास भाग पाडून त्यांची फसवणूक केली आहे. पैसे परत मागितल्यास जिवे ठार मारण्याची धमकी दिल्याची फिर्याद तालुका पोलीस ठाण्यात दाखल आहे.
या प्रकरणी पुणे ग्रामीण पोलिस स्थानिक गुन्हे शाखा व बारामती तालुका पोलिसांनी मनोहर मामाला शुक्रवारी (दि १०) सालपे (जि.सातारा) येथे फार्महाऊसवर जाऊन ताब्यात घेतले आहे. त्यानंतर बारामती ग्रामीण पोलीस ठाण्यात आणत त्याला शुक्रवारी सायंकाळी अटक करण्यात आली.
आज मनोहरमामा यास न्यायालयात हजर केल्यानंतर न्यायालयाने ५ दिवसांची पोलीस कोठडी सुनावली आहे. आरोपीच्यावतीने आज अ‍ॅड. विजयसिंह ठोंबरे यांनी बाजु मांडली. तर पोलीस प्रशासनाच्यावतीने सरकारी वकील किरण सोनवणे यांनी बाजु मांडली. दोन्ही बाजुचे युक्तीवाद ऐकल्यानंतर न्यायाधीश गिऱ्हे यांनी मनोहरमामा यास पाच दिवसांची पोलीस कोठडी सुनावली आहे.
दरम्यान, मनोहरमामा भोसले यांना केलेली अटक बेकायदा आहे. बनावट तक्रारदार उभा करुन सदरच्या गुन्ह्याबाबत तीन वर्षांनंतर बनावट गुन्हा दाखल केल्याचा दावा आरोपीचे वकील ठोंबरे यांनी पत्रकारांशी बोलताना केला. न्यायालयाच्या आवारात पोलिसांनी कडेकोट पोलीस बंदोबस्त ठेवला होता. मनोहरमामाच्या भक्तांसह समर्थकांची न्यायालय परीसरात गर्दी झाली होती.
