सोलापूर : आपल्या विविध मागण्यांसाठी चार दिवसांपासून अन्नत्याग आंदोलन केलेल्या सोलापुरातील एसटी कर्मचाऱ्याची प्रकृती काल खालावली. शनिवारी (ता. 13 ) त्यांची प्रकृती खालावल्याने त्यांना सिव्हिल हॉस्पिटलमध्ये उपचारासाठी हलवण्यात आले.
मनोज मुदलियार असं या कर्मचाऱ्याचं नाव आहे. तरीही त्यांनी अन्नत्याग आंदोलन सोडण्यास नकार दिला आहे. गेल्या काही दिवसांपासून राज्य परिवहन महामंडळाच्या कर्मचाऱ्यांनी बेमुदत संप पुकारला आहे. आपल्या प्रलंबित मागण्या पूर्ण व्हाव्यात यासाठी हे आंदोलन चालू आहे.
यात सोलापुरातही एसटी कर्मचारी मनोज मुदलियार यांनी अन्नत्याग आंदोलन सुरू केलं आहे. चार दिवसापासून त्यांचे आंदोलन सुरू आहे. त्यामुळे त्यांची प्रकृती ढासळली असून एसटीचे वरिष्ठ आधिकारी अन्नत्याग आंदोलन मागे घेण्यासाठी त्यांची समजूत काढत आहेत. मात्र मुदलियार आपल्या मागण्यांवर ठाम असून अन्नत्याग आंदोलन मागे घेणार नसल्याचे सांगितले.
मुदलीयार यांच्यासोबत एसटीचे अनेक कर्मचारी उपस्थित होते. दरम्यान सिव्हिल हॉस्पिटलमध्ये वाहतूक नियंत्रक विलास राठोड, आगार व्यवस्थापक कुलकर्णी यांनी समजूत काढण्याचा प्रयत्न केला, मात्र मुदलियार हे ऐकणास तयार नसल्याचं सांगितले जात आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
* भाजप जिल्हाध्यक्षाची विभाग नियंत्रकाला दमबाजी
महाराष्ट्र राज्य परिवहन महामंडळ राज्य सरकारमध्ये विलीन करून कर्मचाऱ्यांना शासकीय कर्मचाऱ्यांचा दर्जा द्यावा, या मागणीसाठी मागील काही दिवसांपासून काम बंद आंदोलन सुरू आहे. राज्य सरकारकडून संप मागे घेण्याचे आवाहन करूनही कर्मचारी मागणीवर ठाम आहेत.
दरम्यान, शुक्रवारी (ता. 12) भाजपचे जिल्हाध्यक्ष श्रीकांत देशमुख यांच्यासह सहाजणांनी सोलापूरच्या विभाग नियंत्रकांना संपात का सहभागी होत नाहीत, म्हणून दमदाटी केली. तर कर्मचाऱ्यांवरील निलंबन मागे घ्या, त्यांना कामावर जाण्याची सक्ती करू नका, असे म्हणून त्यांना कार्यालयातून बाहेर जाण्यास अडथळा आणल्याप्रकरणी विभाग नियंत्रक विलास राठोड यांनी त्यांच्याविरुद्ध फौजदार चावडी पोलिसांत फिर्याद दिली. त्यानुसार त्यांच्यावर गुन्हा दाखल झाला आहे.
सोलापूर आगारातील परिवहन कर्मचारी हे आगारासमोरच आंदोलनासाठी बसले आहेत. शुक्रवारी (ता. 12) दुपारी तीनच्या सुमारास भाजपचे जिल्हाध्यक्ष श्रीकांत देशमुख, गणेश भोसले, नितीन करजोळे, गीता पाटोळे, धनश्री खटके, सविता कस्तुरे यांनी सोलापूर विभागाच्या आगार नियंत्रकाच्या कार्यालयात धाव घेतली. मास्क न घालता, सोशल डिस्टन्सिंगचे पालन न करता त्यांनी कार्यालयात प्रवेश केला. त्यानंतर त्यांनी, तुम्ही कर्मचाऱ्यांच्या संपात सहभागी का होत नाही, असा जाब विचारला आणि देशमुख यांनी निलंबित केलेल्या कर्मचाऱ्यांचे निलंबन मागे घ्या, अन्यथा तुम्ही काम कसे करता हे बघून घेतो, अशी दमदाटी केल्याचेही फिर्यादीत म्हटले आहे.
