परभणी : परभणीच्या पालम नगरपंचायतीच्या मतदानाच्या पूर्वसंध्येला मतदारांना पैसे देऊन मतदान खरेदी करण्याचा प्रकार उघडकीस आला आहे. राष्ट्रवादी काँग्रेसच्या नेत्याला पैसे वाटप करताना पकडण्यात आले आहे. या प्रकरणी सात जणांना अटक करण्यात आली आहे.
पोलिसांनी नगदी रक्कम आणि मतदारांच्या याद्या असा मुद्देमाल पोलिसांनी जप्त केला आहे. त्यांच्याकडून 25 हजार रोख आणि मतदार याद्या ही जप्त करण्यात आल्या आहेत. लाल खान पठाण असे गुन्हा दाखल झालेल्या राष्ट्रवादीच्या उमेदवाराचे नाव आहे.
परभणी जिल्ह्यातील एकमेव नगर पंचायत असलेल्या पालम नगर पंचायतची निवडणूक सुरू असून उद्या मतदान होणार आहे. 17 जागांपैकी ओबीसी आरक्षित 4 जागा सोडून 13 जागांसाठी ही निवडणूक पार पडत आहे. या निवडणुकीसाठीच पैसे वाटप करताना या खान याला पकडण्यात आले होते.
काल रात्री म्हणजे 19 डिरेंबर रोजी पालम शहरातील वॉर्ड क्रमांक 14 मध्ये हाके गल्लीत राष्ट्रवादीचे उमेदवार लाल खान पठाण हे आपल्या साथीदारांना घेऊन पैसे वाटप करत असल्याची माहिती निवडणूक विभाग फिरते गस्त प्रमुख आकाश पोळ यांना मिळाली होती.
तुमच्या हक्काचे ‘सुराज्य डिजिटल’ फेसबुक पेज, ट्विटर, कू ॲपवर आणि ‘टेलिग्राम’वरही उपलब्ध
मिळालेल्या माहितीच्या आधारे पोळ यांनी पथकासह या ठिकाणी धाड टाकली. यावेळी एका रजिस्टरमध्ये मतदार यादी घेऊन 500 रुपये प्रमाणे वाटप सुरू असल्याचे पथकाच्या निदर्शनास आले. पथक प्रमुखांनी त्यांना पकडण्याचा प्रयत्न केला असता लाल खान पठाण आणि एक जण धक्काबुक्की करून पळून गेले. मात्र पथकाने इतर 5 जणांना पकडले. त्यांच्याकडून 25 हजार रुपये जप्त करण्यात आले असून मतदार यादी ही जप्त करण्यात आल्या आहेत.
दरम्यान, या प्रकरणात आज पालम पोलिसांत लाल खान पठाण, रमेश वाघमारे, अलीम खान पठाण, ज्ञानोबा घोरपडे, भागवत हाके, मधुकर हाके, बापूराव कवडे या 7 जणांवर भारतीय दंड संहिता 1860 कलम 186,188, 353, 171 e, 171 b, महाराष्ट्र नगर परिषद, नगर पंचायत, औद्योगिक नगर अधिनियम 1965 कलम 22 नुसार गुन्हा दाखल करण्यात आला आहे.
* राज्यात आज 106 नगरपंचायतींसाठी मतदान
– राज्यात आज 106 नगरपंचायत निवडणुकांसाठी मतदान होत आहे. सोलापूर जिल्ह्यातील पाच नगरपंचायतीसाठी आज मतदान होत आहे.
ओबीसींच्या राजकीय आरक्षणाशिवाय स्थानिक स्वराज्य संस्थांमध्ये ही निवडणूक पार पडत आहे. मागील काही दिवसांपासून निवडणूक प्रचार जोरात सुरु होता. सोमवारी प्रचार संपल्यानंतर आज मतदान पार पडत आहे. या निवडणुकीत अनेक राजकीय नेत्यांच्या प्रतिष्ठा पणाला लागल्या आहेत.
