विरवडे : मोहोळ तालुक्यातील कामती पोलीस स्टेशन
सहाय्यक पोलीस निरीक्षक किरण उंदरे यांच्या बदलीसाठी राजकीय घडामोडी घडू लागल्या असून यात कोण बाजी जिंकणार याकडे मोहोळ तालुक्यातील जनतेचे लक्ष लागले आहे. या बदलीसाठी शिवसेना आक्रमक झाली तर काँग्रेस ही बदली होऊ नये म्हणून आक्रमक झाली आहे.
सहायक पोलीस निरिक्षक किरण उंदरे यांची बदली व्हावी यासाठी शिवसेना आंदोलनाचे हत्यार उपासले आहे. उंदरे यांची बदली होऊ नये म्हणू काँग्रेसदेखील रस्त्यावर उतरून जनआंदोलन करणार असल्याचा इशारा दिला आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
किरण उंदरे यांच्याकडे दोन वर्षापासून कामती पोलीस स्टेशनचा पदभार आहे. त्यांनी पदभार घेतल्यापासून कामती पोलीस ठाण्याच्या हद्दीत अवैध धंद्याना सुरुवातीच्या काही महिने चाप बसला होता. त्यानंतर अवैध धंदे जोमाने सुरु झाले. या अवैध धद्यांना उंदरे हे खत पाणी घालत असल्याचा आरोप शिवसेना तालुका प्रमुख अशोक भोसले यांनी केला होता. याबाबत सपोनि उंदरे यांची बदली व्हावी, अशी मागणी केली होती.
गेल्या महिन्यांत सोलापूर ग्रामीणचे पोलीस अधिक्षक मनोज पाटील यांनी सोलापूर जिल्ह्यातील काही सहाय्यक निरीक्षकांच्या जिल्हा अंतर्गत प्रशासकीय बदल्या केल्या होत्या. या बदलीमध्ये उंदरे यांचा समावेश होता. मात्र त्यानंतरही किरण उंदरे यांनी कामतीचा पदभार सोडलेला नाही. त्यामुळे शिवसेना आंदोलनाच्या तयारीत आहे व येत्या काही दिवसांत तालुका प्रमुख अशोक भोसले यांच्या नेतृत्वाखाली सर्वपक्षीय पदाधिकारी आंदोलन करण्याचा इशारा निवेदनाद्वारे दिला आहे.
याविरोध काँग्रेससह अन्य पक्ष संघटना सपोनि किरण उंदरे यांच्या समर्थनार्थ पुढे सरसावल्या आहेत. उंदरे हे प्रामाणिक कर्तव्यदक्ष अधिकारी असल्याचे सांगत या परिसरातील अवैध धंदे, वाळू चोरी व अन्य धंदे बंद आहेत. त्यांच्यामुळेच या परिसरातील कायदा व सुव्यवस्था टिकून आहे. सामाजिक सलोखा राखला आहे. त्यामुळे त्यांची बदली करू नये, अशी मागणी काँग्रेस मागासवर्गीय सेलचे जिल्हाध्यक्ष गौरव खरात यांनी केली आहे. गरज पडल्यास जनआंदोलन करून रस्त्यांवर उतरण्याचा इशारा ही त्यांनी दिला.
