लातूर, 21 मार्च (हिं.स.)।
जागतिक चिमणी दिवसानिमित्त जिल्हाधिकारी वर्षा ठाकूर-घुगे यांच्या संकल्पनेतून जिल्हाधिकारी कार्यालय परिसरातील वृक्षांवर धान्य व पिण्याच्या पाण्याची सोय उपलब्ध करण्यात आली आहे. वन विभागामार्फत हा उपक्रम राबविण्यात आला. आगामी उन्हाळा लक्षात घेवून लातूर जिल्ह्यातील नागरिकांनी आपल्या घराच्या परिसरातील वृक्षावर चिमण्यांसाठी अशाप्रकारे छोट्या भांड्यात खाद्य व पिण्याचे पाणी ठेवण्याचे आवाहन जिल्हाधिकारी ठाकूर-घुगे यांनी यावेळी केले.
जिल्हाधिकारी कार्यालय परिसरात चिमण्यांसाठी धान्य व पिण्याचे पाणी ठेवण्यात आल्यानंतर जिल्हाधिकारी ठाकूर-घुगे यांनी स्वतःच्या निवासस्थानीही वृक्षांवर चिमण्यांसाठी अशी सुविधा केली. तसेच इतर अधिकारी, कर्मचारी यांनीही आपल्या घराच्या बाल्कनीत, परिसरातील वृक्षांवर पक्ष्यांसाठी अशाप्रकारे धान्य व पाणी ठेवण्याचे आवाहन केले.
