जिजाऊ रथ यात्रा सोलापुरात येणार पण कधी ?

सोलापुरी माता जिजाऊ प्रेमींकडून स्वागताची जय्यत तयारी

प्रतिनिधी
सोलापूर : मराठा सेवा संघ महाराष्ट्र आयोजित ’मराठा जोडो अभियान’ अंतर्गत संपूर्ण राज्यात जिजाऊ रथ यात्रेचं आयोजन केले आहे. संस्थापक अध्यक्ष पुरुषोत्तम खेडेकर यांच्या सूचनेनुसार मंगळवारी, 18 मार्च शहाजी महाराज यांच्या जयंती दिनी वेरूळ गढी येथून रथ यात्रेस मोठ्या उत्साहात प्रारंभ झाला, मंगळवारी, 25 मार्च रोजी सायंकाळी जिजाऊ रथ यात्रेचं सोलापूर शहरात छत्रपती संभाजी महाराज चौकात भव्य स्वागत होईल, या स्वागताची जय्यत तयारी सोलापुरातील तमाम माता जिजाऊ प्रेमींकडून केली जात आहे

सोलापूर शहरातील सर्व सामाजिक, राजकीय, व्यावसायिक, सांस्कृतिक क्षेत्रातील मान्यवर स्वागतासह मिरवणुकीला उपस्थित राहणार आहेत. स्वागतानंतर अनेकविध पथकांच्या सोबत वाद्यासह रथयात्रा मिरवणुकीने छत्रपती शिवाजी महाराज चौकात अभिवादन व पूजन करून चार हुतात्मा व डॉ. बाबासाहेब आंबेडकर यांना अभिवादन होईल. 7.00 वाजता नंतर चार हुतात्मा चौकात शाहीर पोवाडे चा कार्यक्रम व त्यानंतर त्याच ठिकाणी मार्गदर्शनपर सभेचे आयोजन केले आहे. अशी माहिती जिल्हाध्यक्ष प्रा. शिवश्री डॉ. जी. के. देशमुख यांनी दिली.45 दिवसांच्या प्रवासानंतर पुणे येथील लाल महलात जिजाऊ रथ यात्रेची सांगता होईल. रथयात्रेसोबत संभाजी ब्रिगेडचे महासचिव सौरभ खेडेकर, मराठा सेवा संघाचे ज्येष्ठ मार्गदर्शक प्रा. अर्जुनराव तनपुरे यांचेसह केंद्रीय पदाधिकारी आहेत.

का काढली जिजाऊ रथ यात्रा ?
सध्या समाजात एकमेकात असणारा संवाद, समन्वय, ओलावा कमी होताना दिसत आहे. यामुळे निर्माण होणार्‍या अडचणी संभ्रम दूर व्हावा. धार्मिक, जातीय व सामाजिक सलोखा निर्माण व्हावा, यासाठी पुरुषोत्तम खेडेकर यांनी संपूर्ण समाजाला चला पुन्हा एकदा एक होऊन सर्व शक्तिमान होऊ या, वाद मिटवून संवाद साधूया अशी एकत्र येण्याची हाक दिली आहे. म्हणून जिजाऊ शिवरायांचा एकीचा व नेकीचा संदेश घेऊन ही जिजाऊ रथ यात्रा मंगळवारी सायंकाळी सोलापुरात दाखल होत आहे. राष्ट्रमाता जिजाऊंचे दर्शन आणि जिजाऊ शिवरायांचे विचार घेण्यासाठी सोलापुरातील सर्व समाजातील बांधव व भगिनींनी बहुसंख्येने रथयात्रेमध्ये सहभागी व्हावे, असे आवाहन शहराध्यक्ष शिवश्री सूर्यकांत पाटील यांनी केले.

हे शिलेदार घेताहेत परिश्रम
रथ यात्रेच्या नियोजनासाठी समन्वयक दत्तामामा मुळे, उपाध्यक्ष बब्रुवाहन माने-देशमुख, संभाजी ब्रिगेड अध्यक्ष सोमनाथ राऊत, उपाध्यक्ष सदाशिव पवार, सेक्रेटरी लक्ष्मण महाडिक, केंद्रीय सदस्य विश्‍वनाथ गायकवाड, संभाजी ब्रिगेडचे प्रकाश ननवरे, मराठा सेवा संघाचे आर. पी. पाटील, राम माने, आदी मराठा सेवा संस्थेचे पदाधिकारी परिश्रम घेत आहेत.

जिजाऊ रथाच्या आगमनाचे असे आहे वेळापत्रक
सोलापूर जिल्ह्यात रविवारी, 23 मार्च रोजी सांगोला येथे रथयात्रेचे आगमन व स्वागत होईल. मिरवणुकीनंतर पंढरपूरला मुक्काम होईल. पुढे अकलूज, टेंभुर्णीमार्गे येऊन कुर्डूवाडीला मुक्काम. मंगळवारी, 25 मार्चला कुर्डूवाडी, माढा, अनगर, मोहोळमार्गे सायं 5.30 वाजता सोलापूर शहरात छत्रपती संभाजी महाराज चौकात जिजाऊ रथ यात्रेचे भव्य स्वागत होईल.