गंदलखोरांच्या अतिक्रमणावर चालला बुलडोजरहायकोर्टाची महापालिकेच्या कारवाईवर स्थगिती
नागपूर, 24 मार्च (हिं.स.) : नागपुरातील दंगलीचा सूत्रधार फहीम खान शमीम खान व आरोपी युनूस अब्दुल हाफिज यांच्या घरावरील बुलडोझर कारवाईला मुंबई उच्च न्यायालयाच्या नागपूर खंडपीठाने आज, सोमवारी स्थगिती दिली. या कारवाईमुळे सुप्रीम कोर्टाच्या निर्णयाचे उल्लंघन झाल्याचे सांगत उच्च न्यायालयातील न्या. नितीन सांबरे आणि न्या. वृषाली जोशी यांच्या खंडपीठाने बुलडोजर कारवाईवर नाराजी व्यक्त केली.
नागपूर हिंसेतील मुख्य आरोपी फहीम खानच्या घरावर सोमवारी सकाळी महापालिकेने बुलडोझरने कारवाई केली. महापालिकेने शुक्रवारी फहीम खानला नोटीस दिली होती आणि सोमवारी अतिक्रमणाची कारवाई केली. यानंतर फहीम खानच्या आईने उच्च न्यायालयात धाव घेतली. उच्च न्यायालयाने या प्रकरणात झालेल्या प्रकारावर तीव्र नाराजी व्यक्त केली. बुलडोझर कारवाई ही भेदभावपूर्वक आहे. लक्ष्य करण्याच्या हेतूने ही कारवाई झाली आहे, असे प्राथमिक निरीक्षण न्यायालयाने नोंदविले. न्यायालयाने याप्रकरणी पुढील कारवाईवर स्थगिती देण्याचे आदेशही दिले.
याशिवाय राज्याचे मुख्य सचिव यांना सर्वोच्च आदेशाच्या अवहेलना प्रकरणात जबाब नोंदविण्याचे निर्देश दिले. नागपूर महापालिकेने सोमवारी सकाळी 10 वाजेच्या सुमाराला बुलडोजर कारवाई सुरू केली. यशोधरानगर ठाण्याच्या हद्दीतील संजय बाग कॉलनी येथील दोन मजली इमारतीचे अनधिकृत बांधकाम पडण्याचे काम सुरू झाले आहे. महापालिकेने काल त्याच्या घरावर अनधिकृत बांधकाम काढून घेण्याची नोटीस बजावली होती. चोवीस तासांची मुदत देण्यात आली होती. त्यानंतर आज, सोमवारी सकाळी महापालिकेचे अतिक्रमण विरोधी पथक संजय बाग कॉलनीत धडकले. वीज वितरण कंपनीने वीज जोडणी तोडण्यात आली.
एखादी व्यक्ती गुन्ह्यातील आरोपी आहे म्हणून त्या व्यक्तीच्या मालमत्तेवर बुलडोझरने पाडकाम करणं हे घटनाविरोधी असल्याचा निर्वाळा सर्वोच्च न्यायालयाने दिला होता. राजस्थान व मध्य प्रदेशमधील अशा प्रकारच्या कारवायांविरोधात दाखल याचिकांवर सविस्तर सुनावणी घेतल्यानंतर न्यायालयाने निकाल दिला होता. मात्र सोमवारी सकाळी नागपूर हिंसेतील मुख्य आरोपी फहीम खान यांच्या घरावर बुलडोझरने कारवाई करण्यास सुरुवात करण्यात आली. अशी कारवाई घटनाविरोधी ठरवतानाच संबंधित प्रशासकीय अधिकाऱ्याला त्यासाठी दोषी धरले जावे, असेही न्यायालयाने यावेळी नमूद केले होते.
