वॉशिंगटन , 22 एप्रिल (हिं.स.)।अमेरिकेच्या ऑरलँडो इंटरनॅशनल एअरपोर्टवर डेल्टा एअरलाइन्सच्या एका विमानात अचानक आग लागली. यावेळी विमानात 282 प्रवासी होते. आगीची माहिती वेळीच मिळाल्याने मोठी जिवीतहानी टळली. विमनातील सर्व प्रवाशांना इमर्जन्सी स्लाइड्समधून तात्काळ बाहेर काढण्यात आलं.
मिळालेल्या माहितीनुसार, सोमवारी(दि.२१) ऑर्लँडो आंतरराष्ट्रीय विमानतळावर डेल्टा एअर लाइन्सच्या विमानाला आग लागल्याची घटना घडली. अटलांटा येथे जाणारं डेल्टा एअरलाइन्सच हे विमान रनवेच्या दिशेने रवाना झालं होतं. त्याचवेळी दोन इंजिन्सपैकी एकामध्ये आग भडकली. त्यानंतर प्रवाशांना आपत्कालीन स्लाइड्सद्वारे बाहेर काढण्यात आले. या घटनेत उजव्या बाजूला असलेल्या इंजिनमधून आगीच्या ज्वाळा निघताना दिसत होत्या.टर्मिनलमध्ये उपस्थित असलेल्या एका प्रवाशाने हे आपल्या कॅमेऱ्यामध्ये कैद केलं आहे. या घटनेची माहिती फेडरल एविएशन एडमिनिस्ट्रेशन आणि डेल्टा एअरलाइन्सकडून देण्यात आली. एफएएने या घटनेची चौकशी सुरु केली आहे.
विमान कंपनीने या घटनेबाबत एक निवेदनही प्रसिद्ध केले आहे. डेल्टा विमानाच्या कर्मचाऱ्यांना विमानाच्या दोन इंजिनांपैकी एकाच्या टेलपाइपमध्ये आगीच्या ज्वाळा दिसल्या, त्यानंतर त्यांनी प्रवासी केबिन रिकामा करण्याची प्रक्रिया अवलंबली. आम्ही आमच्या ग्राहकांच्या सहकार्याचे कौतुक करतो आणि या अनुभवाबद्दल दिलगीर आहोत. सुरक्षिततेपेक्षा महत्त्वाचे काहीही नाही आणि डेल्टा टीम आमच्या ग्राहकांना त्यांच्या अंतिम गंतव्यस्थानावर शक्य तितक्या लवकर पोहोचवण्यासाठी काम करतील.
