सोलापूर, 28 एप्रिल (हिं.स.)।
सहकार महर्षी शंकरराव मोहिते-पाटील सहकारी साखर कारखाना गळीत हंगाम 2025-26 करिता कारखान्याने 9 लाख मे.टन ऊस गाळप करण्याचे उद्दिष्ट ठेवले आहे. बैलगाडी, बजाट, ट्रक, ट्रॅक्टर व ऊस तोडणी यंत्राचे मालक व ठेकेदार यांनी जास्तीत जास्त तोडणी वाहतुकीचे करार करून गाळप हंगाम यशस्वीपणे पार पाडण्यासाठी सहकार्य करण्याचे आवाहन कारखान्याचे चेअरमन जयसिंह मोहिते-पाटील यांनी केले आहे.
सहकार महर्षी शंकरराव मोहिते-पाटील सहकारी साखर कारखान्यामध्ये गळीत हंगाम 2025-26 करिता बैलगाडी, बजाट, ट्रक, ट्रॅक्टर व ऊस तोडणी यंत्र यांचे तोडणी वाहतूक करारांचा शुभारंभ चेअरमन जयसिंह मोहिते-पाटील यांच्या हस्ते झाला. यावेळी ते बोलत होते.
राज्याचे माजी उपमुख्यमंत्री विजयसिंह मोहिते-पाटील यांच्या मार्गदर्शनाखाली व चेअरमन जयसिंह मोहिते-पाटील यांच्या नेतृत्वाखाली कारखाना प्रगतीपथावर वाटचाल करीत आहे. कारखान्याकडे गत हंगाम 2024-25 मध्ये ऊस तोडणी वाहतुकीचे काम केलेल्या वाहनमालक यांची ऊस तोडणी वाहतुकीची संपूर्ण बिले अदा करण्यात आली असल्याचे कार्य. संचालक राजेंद्र चौगुले यांनी सांगितले.
