तात्रिक बिघाडामुळे उतरवण्यात आले विमान
कोलकाता, 17 जून (हिं.स.) : अहमदाबाद येथील अपघातानंतर एअर इंडियाच्या आणखी एका विमानात तांत्रिक बिघाड झाल्‍याची घटना घडली. सॅन फ्रान्सिस्कोहून मुंबईला येणाऱ्या एअर इंडियाच्या विमानाच्या इंजिनमध्ये तांत्रिक बिघाड झाला. त्यामुळे या विमानाचे आज, मंगळवारी कोलकाता विमानतळावर नियोजित थांब्यादरम्यान प्रवाशांना उतरवावे लागले.
यासंदर्भातील माहितीनुसार फ्लाईट (एआय180) रात्री 12.45 वाजता विमानतळावर पोहचले. परंतु, तांत्रिक बिघाडामुळे उड्डाणाला उशीर झाला. त्यामुळे पहाटे 5.20 वाजता विमानातील
सर्व प्रवाशांना उतरण्यास सांगण्यात आले. एअर इंडियाचे विमान (एआय-180) वेळापत्रकानुसार सॅन फ्रान्सिस्को विमानतळावरून निघाले. त्यानंतर रात्री 12.45 वाजता कोलकाता विमानतळावर पोहोचल्यावर डाव्या इंजिनमध्ये तांत्रिक बिघाड झाला. त्यानंतर 4 तासांनी पहाटे 5.20 वाजता सर्व प्रवाशांना विमानातून उतरण्यास सांगण्यात आले. उड्डाण सुरक्षेच्या दृष्टीने हा निर्णय घेण्यात आला असल्‍याचे विमानाच्या कॅप्टनने प्रवाशांना सांगितले.गेल्या 12 जून रोजी अहमदाबादमध्ये झालेल्या विमान अपघातानंतर एअर इंडिया प्रवाशांच्या संदर्भात कुठलाही धोका पत्करू इच्छीत नाही. त्यामुळे हा निर्णय घेण्यात आल्याची माहिती अधिकाऱ्यांनी दिली.
