विमानतळाची कसून तपासणी, धमकी पोकळ ठरली
हैदराबाद, 18 जून (हिं.स.) : तेलंगणाची राजधानी हैदराबादच्या बेगमपेट विमानतळाला बॉम्बस्फोटाची धमकी देण्यात आली होती. ई-मेलवर मिळालेल्या या धमकीनंतर संपूर्ण विमानतळाची कसून चौकशी करण्यात आली. त्यानंतर ही धमकी पोकळ अफवा असल्याचे सिद्ध झाले.
याबाबत पोलिसांनी दिलेल्या माहितीनुसार हैदराबादच्या बेगमपेट विमानतळाच्या मुख्य सुरक्षा अधिकाऱ्याला आज, बुधवारी धमकीचा ई-मेल मिळाला. त्यात विमानतळ परिसरात बॉम्ब ठेवल्याचे म्हंटले होते. त्यानंतर विमानतळाच्या मुख्य सुरक्षा अधिकाऱ्यांनी याबाबत तात्काळ हैदराबाद पोलिसांना कळवले. शहराच्या मध्यभागी असलेल्या विमानतळावर बॉम्ब शोध पथक दाखल झाले. त्यानंतर विमानतळ परिसराची आणि त्याच्या आसपासची कसून तपासणी करण्यात आली. सखोल चौकशीनंतर पोलिस पथकांना कोणतीही संशयास्पद वस्तू आढळली नाही. अधिकाऱ्यांनी धमकीचा ई-मेल अफवा असल्याचे घोषित केले. ईमेल पाठवणाऱ्याची ओळख पटवण्याचे प्रयत्न सुरू आहेत,
असे पोलिसांनी सांगितले. हैदराबादच्या शमशाबाद परिसरातील राजीव गांधी आंतरराष्ट्रीय विमानतळावर आंतराराष्ट्रीय व वाणिज्यिक विमानांचे संचलन होते. तर बेगमपेट विमानतळावर 2008 पासून केवळ चार्टर्ड विमाने आणि सैन्य विमानांचे संचलन होते. गेल्या 12 जून रोजी झालेल्या एअर इंडिया विमानाचा अपघातानंतर एव्हीएशन क्षेत्रात संवेदनशीलता निर्माण झाली आहे. इंडिगोच्या कोच्ची-मुंबई विमानाला देखील मंगळवारी बॉम्बस्फोटाची धमकी देण्यात आल्यानंतर या विमानाचे नागपुरात इमर्जन्सी लँडिंग करण्यात आले होते. त्यानंतर आज, बुधवारी बेगमपेट विमानतळाला बॉम्बस्फोटाची धमकी देण्यात आली. या दोन्ही घटनांमागे काही साधर्म्य आहे का याचा देखील तपास केला जातोय.
————————–
