रायगड, 2 ऑगस्ट – युवा पत्रकार प्रथमेश कुडेकर यांच्यावर अज्ञात हल्लेखोरांनी केलेल्या प्राणघातक हल्ल्याने संपूर्ण पत्रकारिता क्षेत्रात संतापाची लाट उसळली आहे. हा हल्ला केवळ एका पत्रकारावर नसून लोकशाही व्यवस्थेवरच केलेला हल्ला असल्याची तीव्र भावना तालुक्यातील सर्व पत्रकारांनी व्यक्त केली आहे.
प्रथमेश कुडेकर आणि त्यांचे मित्र मयूर रणदिवे हे नेहमीप्रमाणे चार फाटा येथील ठाकरे उपहारगृहात चहा पिण्यास गेले होते. परतताना कृषी विद्यापीठाच्या जुन्या प्रवेशद्वारासमोर एका व्यक्तीने हात करून त्यांना थांबवले. वाटले की, पत्ता विचारायचा आहे, म्हणून ते थांबले; मात्र काही कळायच्या आतच चार-पाच अज्ञातांनी त्यांच्यावर प्राणघातक हल्ला केला.
हल्लेखोरांनी हातात फायटर, लोखंडी पाईप आणि धारदार शस्त्रे घेऊन कुडेकर आणि त्यांच्या मित्रावर हल्ला केला. या भीषण हल्ल्यात दोघांनाही गंभीर दुखापत झाली. मित्राने धाडसाने मधे पडून कुडेकर यांचे प्राण वाचवले. काही वेळातच घटनास्थळी जमाव जमा झाल्याने हल्लेखोरांनी सिल्व्हर रंगाच्या वॅगनर गाडीतून पलायन केले.
या घटनेनंतर पत्रकार क्षेत्रात संतापाचा उद्रेक झाला. कर्जत प्रेस असोसिएशनचे सदस्य, कायदेशीर सल्लागार ॲड. कैलास मोरे, कोंढाणा टाइम्सचे संपादक रमाकांत जाधव, धर्मेंद्र मोरे, लोकेश यादव, सतीश देशपांडे, माजी नगरसेवक ॲड. संकेत भासे आणि अन्य प्रतिनिधींनी कर्जत पोलीस स्टेशनमध्ये वरिष्ठ पोलीस निरीक्षक संदिप भोसले यांची भेट घेतली. गुन्हा क्रमांक 199/2025 नुसार भारतीय न्याय संहिता कलम 118(1), 115(2), 3(5) अंतर्गत गुन्हा नोंदवला गेला. हल्लेखोरांना लवकरात लवकर अटक करून कडक कारवाई करावी, अशी मागणी करण्यात आली.
पत्रकारांनी एकमुखाने हल्ल्याचा निषेध करत पोलिसांना तातडीने कारवाईचे आवाहन केले. कर्जत पोलीस ठाण्यात अज्ञात हल्लेखोरांविरोधात गुन्हा दाखल झाला असून पोलीस उपनिरीक्षक किरण नवले तपास करीत आहेत.
पत्रकार सुरक्षा कायदा अंमलात आणावा, हल्लेखोरांवर कठोर कारवाई व्हावी आणि प्रकरण गंभीरतेने हाताळावे, अशी मागणी तालुक्यातील पत्रकारांकडून होत आहे.
