अलिबाग, 8 ऑगस्ट – रायगड जिल्ह्यातील राजकीय समीकरणांमुळे येत्या 15 ऑगस्टला रायगड किल्ल्यावर ध्वजारोहण कोण करणार, याबाबत अनिश्चितता निर्माण झाली आहे. श्रीवर्धन मतदारसंघातून राष्ट्रवादी काँग्रेसच्या आदिती तटकरे या मंत्री आहेत, तर महाडमधून शिंदे गटाच्या शिवसेनेचे भरत गोगावले मंत्री आहेत.
भरत गोगावले हे सत्ता परिवर्तनानंतर शिंदे गटात दाखल झाले असून, रायगडमध्ये आपलं राजकीय वर्चस्व वाढवण्याच्या प्रयत्नात आहेत. राष्ट्रवादीचे सुनील तटकरे हे 2024 च्या लोकसभा निवडणुकीत रायगडमधून निवडून आलेले एकमेव खासदार आहेत, ज्यांनी या मतदारसंघात पक्षाचा झेंडा कायम ठेवला आहे.
काही महिन्यांपूर्वी राज्य सरकारने पालकमंत्री पदांची यादी जाहीर केली होती, ज्यात रायगडसाठी आदिती तटकरे यांची नियुक्ती झाली होती. मात्र, भरत गोगावले यांनी या निर्णयाला तीव्र विरोध दर्शवला. परिणामी, सरकारने काही वेळातच ती नियुक्ती मागे घेतली आणि आजतागायत रायगडचा अधिकृत पालकमंत्री जाहीर झालेला नाही. त्यामुळे स्वातंत्र्य दिनानिमित्त रायगडावर ध्वजारोहण कोण करणार, याकडे आता सर्वांचे लक्ष लागले आहे.
