वॉशिंग्टन, 14 ऑगस्ट – अमेरिकेचे राष्ट्राध्यक्ष डोनाल्ड ट्रम्प यांनी रशियाचे राष्ट्राध्यक्ष व्लादिमीर पुतिन यांना भेटीपूर्वीच युक्रेन युद्धाबाबत कठोर इशारा दिला आहे. “15 ऑगस्ट रोजी होणाऱ्या चर्चेनंतरही जर पुतिन युद्ध संपवण्यास सहमत झाले नाहीत, तर रशियाला गंभीर परिणामांना सामोरे जावे लागेल,” असे ट्रम्प यांनी म्हटले. दोन्ही नेते अलास्कामध्ये भेटणार आहेत.
ट्रम्प यांनी युक्रेनचे अध्यक्ष वोलोदिमिर झेलेन्स्की आणि युरोपीय नेत्यांसोबत व्हर्च्युअल बैठक घेतल्यानंतर पत्रकार परिषदेत हे वक्तव्य केले. ते म्हणाले, “मला हे युद्ध संपवायचे आहे. हे बायडेनचे युद्ध आहे, पण गेल्या सहा महिन्यांत मी पाच युद्धे संपवली, तशीच मला हे युद्ध संपवण्याचा अभिमान वाटेल.” जर पुतिन यांनी युद्ध थांबवण्यास नकार दिला, तर त्यांना धोकादायक परिणामांना सामोरे जावे लागेल, असेही त्यांनी स्पष्ट केले.
अमेरिका आणि रशियाच्या राष्ट्राध्यक्षांची शेवटची भेट जून 2021 मध्ये जिनिव्हा येथे झाली होती. पुतिन आणि ट्रम्प पहिल्यांदाच अमेरिकेच्या भूमीवर भेटणार आहेत. रशियाने प्रारंभी यूएईमध्ये भेट घेण्याची सूचना केली होती, मात्र ट्रम्प यांनी अलास्काची निवड केली. या भेटीचा उद्देश युक्रेनमधील साडेतीन वर्षांपासून सुरू असलेले युद्ध संपवणे हा आहे.
दरम्यान, झेलेन्स्की यांनी स्पष्ट केले की युक्रेनच्या संमतीशिवाय त्याच्या जमिनीबाबत कोणताही निर्णय होऊ शकत नाही. त्यांनी युद्धबंदी, सुरक्षा हमी आणि युरोप किंवा नाटोमध्ये सामील होण्याच्या युक्रेनच्या संधींवर रशियाला व्हेटो अधिकार नसावा, अशी भूमिका मांडली. झेलेन्स्की म्हणाले की, पुतिन यांना शांतता नको असून ते युक्रेनवर कब्जा करण्याच्या प्रयत्नात आहेत.
युरोप आणि युक्रेनला भीती आहे की ट्रम्प-पुतिन यांच्यातील करारामुळे रशियाला युक्रेनचा जवळपास पाचवा हिस्सा मिळू शकतो. या चर्चेत फिनलंड, फ्रान्स, ब्रिटन, इटली, पोलंड, युरोपियन युनियनचे नेते आणि नाटोचे सरचिटणीस मार्क रुटे देखील सहभागी झाले होते.
