नवी दिल्ली, २१ ऑगस्ट: इंडी आघाडीचे उपराष्ट्रपती पदाचे उमेदवार बी. सुदर्शन रेड्डी यांनी आज संसदेतील निवडणूक अधिकाऱ्याकडे नामांकन अर्ज दाखल केला. यावेळी काँग्रेस अध्यक्ष सोनिया गांधी, माजी अध्यक्ष राहुल गांधी, एनसीपी प्रमुख शरद पवार, समाजवादी पक्षाचे रामगोपाल यादव आणि शिवसेनेचे संजय राऊत यासह विरोधी पक्षांचे अनेक वरिष्ठ नेते हजर होते.
उपराष्ट्रपती जगदीप धनखड यांच्या राजीनाम्यानंतर होणाऱ्या या निवडणुकीत रेड्डी यांचा सामना एनडीएच्या उमेदवार सी. पी. राधाकृष्णन यांच्याशी असेल. नामांकनासाठी २१ ऑगस्ट ही अंतिम तारीख होती, तर २५ ऑगस्टपर्यंत उमेदवारी मागे घेता येईल. मतदान ९ सप्टेंबर रोजी होणार असून त्याच दिवशी मतमोजणी होईल.
बी. सुदर्शन रेड्डी हे गुवाहाटी उच्च न्यायालयाचे माजी मुख्य न्यायमूर्ती आणि गोव्याचे पहिले लोकायुक्त आहेत. ते आंध्र प्रदेशचे रहिवासी असून २००७ ते २००९ दरम्यान सर्वोच्च न्यायालयाचे न्यायमूर्ती होते. ही निवडणूक विशेष महत्त्वाची आहे कारण दोन्ही उमेदवार दक्षिण भारतीय आहेत.
