मुंबई, 28 ऑगस्ट – मनसे प्रमुख राज ठाकरे यांच्या दादर येथील शिवतीर्थ निवासस्थानी दीड दिवसाचा गणपती विराजमान असतो. या काळात अनेक मान्यवर दर्शनासाठी येतात. आज, गुरुवारी उपमुख्यमंत्री एकनाथ शिंदे यांनी राज ठाकरे यांच्या घरी जाऊन बाप्पाचे दर्शन घेतले आणि त्यानंतर माध्यमांशी संवाद साधला. यावेळी त्यांनी उद्धव ठाकरे यांच्यावर अप्रत्यक्ष टोला लगावला.
शिंदे म्हणाले, “गेल्यावर्षीप्रमाणे याही वर्षी गणेश दर्शनाला आलो. आम्ही दरवर्षी येतो, पण यावेळी काही नवीन लोक आले त्याचा आनंद झाला. बाप्पाला साकडे घालताना महाराष्ट्रातील सर्व विघ्ने दूर करावीत, शेतकऱ्यांना सुखी ठेवावे, राज्यातील जनतेला चांगले दिवस यावेत आणि दु:ख भोगणाऱ्यांना सुख लाभावे अशी प्रार्थना केली.”
ते पुढे म्हणाले, “आजच्या भेटीचा राजकीय अर्थ काढू नका. आमचा स्नेह आहे आणि स्नेहभोजनही होईल. कुठलेही कुटुंब एकत्र आले तर ती चांगली गोष्ट आहे. गणपती बाप्पाने सगळ्यांना सुबुद्धी द्यावी, त्यातच सर्वांचे कल्याण आहे. मी अनेक वर्षांपासून राज ठाकरेंच्या घरी येतो, आमचे संबंध चांगले आहेत. काही जण पहिल्यांदा आले आहेत. गणपतीत प्रत्येक जण एकमेकांच्या घरी जात असतो.”
महायुतीबाबत विचारलेल्या प्रश्नावर शिंदेंनी सूचक विधान करत म्हटले, “गणपती दर्शनासाठी आलो आहे, राजकीय चर्चा नाही. काही तरी ‘राज’ राहू द्या, सगळ्याच गोष्टी सांगायच्या नसतात.”
