इगतपुरी, 18 सप्टेंबर।
नाशिक ग्रामीण पोलीस हद्दीत अवैधरित्या चालवण्यात येणाऱ्या विविध कॉल सेंटरची माहिती काढून त्यांच्यावर कारवाई करणे बाबत सूचना नाशिक ग्रामीण पोलीस अधीक्षक बाळासाहेब पाटील व अपर पोलीस अधीक्षक आदित्य मिरखेलकर यांच्याकडून देण्यात आल्या होत्या.
इगतपुरीच्या पोलीस निरीक्षक सारिका अहिरराव यांना व त्यांच्या पथकाला मिळालेल्या गुप्त माहितीनुसार दि. १५ सप्टेंबरला सायंकाळी ६ वाजता मिनाताई ठाकरे संकुल, इगतपुरी येथे अवैधरित्या चालणाऱ्या कॉल सेंटरवर छापा टाकण्यात आला. या ठिकाणी क्रेडिट कार्ड द्वारे दिलेले लोन, गृह कर्ज व संबंधित कर्जाची वसुली करण्यासाठी कर्ज खातेदार आणि त्यांचे नातेवाईक, मित्र, शेजारी यांना बँकेकडील बनावट ओळख धारण करून बेकायदेशीरपणे धमकीचे कॉल करून त्यांच्याकडून कर्ज वसुलीचा प्रयत्न केला जात असल्याची खात्री पटली. म्हणून इगतपुरी पोलीस ठाण्यात गुन्हा दाखल करण्यात आला आहे.
अवैध कॉल सेंटर चालविणारे १) नरेंद्र शशीकांत भोंडवे (वय ३२ वर्षे), रा. महात्मा गांधी नगर, महालक्ष्मी मंदिर जवळ, इगतपुरी आणि २) पारस संजय भिसे (वय २६ वर्षे), रा. रमाबाई कॉलनी, प्रयदर्शनी चाळ, कमीटी घाट, कोपर, मुंबई यांना अटक करण्यात आली आहे. त्यांना पोलीस हवालातीत ठेवण्यात आले आहे.
या कारवाईत २४ लाख ३२ हजार रुपये किमतीचे कॉम्प्युटर, लॅपटॉप, विविध कंपन्यांचे मोबाईल फोन व सिम कार्ड असा मुद्देमाल जप्त करण्यात आला आहे. या ठिकाणी ४० ते ५० कर्मचारी काम करत असल्याचे, तसेच सदर कर्मचारी अवैधरित्या कर्जखातेदारांचा वैयक्तिक डेटा संकलित करत असल्याचे दिसून आलेले आहे. या कॉल सेंटरला स्थानिक नगर प्रशासनाचा वैध परवाना नसल्याचे निदर्शनास आले आहे. या कॉल सेंटरवर आरबीएल, एचडीबीएफ फायनान्स, ग्रो फायनान्स यांच्यासाठी कर्ज वसुलीचे काम करत असल्याचे दिसून आले आहे. या गुन्ह्याचा तपास सायबर पोलीस स्टेशनचे नागेश मोहीते करत आहेत.
