वॉशिंग्टन : अमेरिकेचे माजी राष्ट्राध्यक्ष डोनाल्ड ट्रम्प यांनी चीनवरील 100 टक्के टॅरिफबाबतचा सूर बदलला आहे. त्यांनी स्पष्ट संकेत दिले आहेत की, जर अमेरिका आणि चीन यांच्यात व्यापार करार झाला, तर चीनवरील टॅरिफ हटवले जाऊ शकतात.
भारतावर 50 टक्के टॅरिफ लावल्यानंतर अमेरिकेने चीनवर तब्बल 100 टक्के टॅरिफ लावण्याचा निर्णय घेतला होता. या निर्णयामुळे दोन्ही देशांमधील व्यापार तणाव वाढला होता. चीननेही अमेरिकेवर निर्बंध लादण्याचे संकेत दिले होते. मात्र, आता ट्रम्प यांच्या अलीकडील विधानामुळे वातावरणात बदल दिसून येतोय.
ट्रम्प यांची भूमिका बदलली
फॉक्स न्यूजला दिलेल्या मुलाखतीत डोनाल्ड ट्रम्प म्हणाले, “चीनवर 100 टक्के टॅरिफ लावणे शाश्वत नाही. जर दोन्ही देशांमध्ये करार झाला नाही, तरच हा टॅरिफ लागू होईल. अन्यथा आम्हाला चीनसोबत कोणतीही अडचण नाही.”
ते पुढे म्हणाले, “अमेरिका आणि चीनमधील संबंध खूप चांगले आहेत. आम्ही दक्षिण कोरियामध्ये होणाऱ्या आगामी बैठकीत यावर चर्चा करणार आहोत. मला खात्री आहे की, चीनसोबत सर्व काही व्यवस्थित होईल.”
टॅरिफचा प्रभाव आणि संभाव्य करार
अमेरिकेने जाहीर केले होते की, चीनवर टॅरिफ लावल्यास चीनमधून येणाऱ्या इलेक्ट्रॉनिक्स, ऑटोमोबाईल्ससारख्या उत्पादनांच्या किंमती वाढतील. अमेरिकेचा दावा आहे की, चीनने दुर्मिळ खनिजांवर निर्बंध लावल्यामुळे हे पाऊल उचलले गेले. मात्र, ट्रम्प यांनी आता संकेत दिले आहेत की, जर दोन्ही बाजूंनी करार झाला तर हे टॅरिफ लागू होणार नाहीत.
भारतावर टॅरिफ आणि चीनचा संदर्भ
भारतावर टॅरिफ लावताना ट्रम्प यांनी म्हटलं होतं की, “भारत रशियाकडून तेल खरेदी करत असल्याने आम्ही टॅरिफ लावत आहोत.” परंतु, चीन हा रशियाकडून तेल खरेदी करणारा सर्वात मोठा देश असल्याचंही त्यांनी अधोरेखित केलं.
1 नोव्हेंबर 2025 पासून चीनवरील टॅरिफची अंमलबजावणी होणार होती, मात्र ट्रम्प यांच्या या ताज्या विधानानंतर दोन्ही देशांमध्ये नव्या व्यापार कराराची शक्यता निर्माण झाली आहे.
