अमरावती, 2 जून (हिं.स.)
राजमाता अहिल्यादेवी होळकर यांच्या 300 व्या जयंतीनिमित्त यावर्षी जिल्ह्यातील प्रत्येक नागरिकांनी आपल्या घरासमोर आईच्या नावाने एक झाड लावण्याचा अनोखा उपक्रम सुरू करून पर्यावरण दिवस साजरा करण्याचे आवाहन पालकमंत्री चंद्रशेखर बावनकुळे यांनी केले आहे.हा अनोखा उपक्रम ‘एक पेड माँ के नाम’नुसार राबविण्यात येणार आहे. या उपक्रमात जिल्हा प्रशासनासह स्थानिक स्वयंसेवी संस्था, विद्यार्थी, सर्व शासकीय विभागातील अधिकारी, कर्मचारी सहभागी होतील. ‘एक पेड माँ के नाम’ हा उपक्रम ५ जून ते १५ ऑगस्ट या कालावधीत राबविण्यात येणार आहे. जागतिक पर्यावरण दिन हा उपक्रम सुरू करण्यात येणार असल्याचे पालकमंत्री श्री. बावनकुळे यांनी सांगितले.
जिल्ह्यातील सुमारे एक हजाराहून अधिक गावांमध्ये हा उपक्रम राबवला जाणार आहे. यात 1 लाखाहून अधिक वृक्षारोपण करण्याचे लक्ष्य ठेवण्यात आले आहे. तसेच 40 हून अधिक स्वयंसेवी संस्था या उपक्रमात सहभागी होणार आहेत. वेगवेगळ्या भागातील 15 हजाराहून अधिक नागरिक या उपक्रमात सहभागी होणार आहेत.
या उपक्रमाचा मुख्य उद्देश पर्यावरण संवर्धनाचे महत्व अधोरेखित करणे आणि नागरिकांमध्ये पर्यावरणाबद्दल जागरूकता निर्माण करणे हा आहे. या अभियानाच्या माध्यमातून जिल्ह्यातील नागरिक पर्यावरण संवर्धनाच्या कार्यात सक्रिय सहभागी होतील आणि पृथ्वीचे रक्षण करण्याचा संकल्प करतील. या अनोख्या उपक्रमात नागरिकांनी सहभागी व्हावे असे आवाहन करण्यात आले आहे.
