* दोन साथीदारांना ७ वर्षांची शिक्षा
* न्यायालयाचे कडक शब्दात ताशेरे
पनवेल, २१ एप्रिल (हिं.स.) : कोल्हापूर जिल्ह्यातील आळते (ता. हातकणंगले) येथील साहाय्यक पोलीस निरीक्षक अश्‍विनी बिद्रे हत्या प्रकरणात मुख्य आरोपी बडतर्फ वरिष्ठ पोलीस निरीक्षक अभय कुरुंदकरला पनवेल सत्र न्यायालयाने जन्मठेपेची शिक्षा सुनावली आहे. सोबतच २० हजार रुपयांचा दंडही ठोठावण्यात आला आहे. तसेच या प्रकरणातील कुरुंदकर यांचे साथीदार कुंदन भंडारी आणि महेश फळणीकर यांना ७ वर्षांची शिक्षा सुनावण्यात आली आहे.
बिद्रे हत्याकांड हे दुर्मिळातील दुर्मिळ प्रकरण असल्याचे मत न्यायालयाने नोंदवले होते. न्यायालयाने स्पष्टपणे नमूद केलं की, ही हत्या क्रूर आणि अमानवी स्वरूपाची होती. एका महिला पोलिस अधिकाऱ्याची फसवणूक करून, नंतर तिचा जीव घेण्याचे कृत्य समाजाला धक्का देणारे आहे. तपासातील पोलिसांच्या भूमिका आणि कार्यपध्दतीवर न्यायालयाने कडक शब्दात ताशेरे ओढले आहेत. दरम्यान प्रकरणातील आरोपी राजू पाटील याची मात्र न्यायालयाने सबळ पुराव्याअभावी निर्दोष मुक्तता केली.
यापूर्वी पनवेल न्यायालयाने ५ एप्रिलला या सर्वांना दोषी ठरवले होते आणि ११ एप्रिलला या सर्वांना शिक्षा सुनावण्यात येणार होती; मात्र काही कारणामुळे ती पुढे गेली आणि २१ एप्रिलला निकाल देण्यात आला.
साहाय्यक पोलीस निरीक्षक अश्‍विनी बिद्रे-गोरे यांची ११ एप्रिल २०१६ रोजी हत्या करून त्यांचा मृतदेह तुकडे करून तो वसईच्या खाडीत फेकून देण्यात आला होता. या प्रकरणी ७ डिसेंबर २०१७ रोजी ठाणे जिल्ह्यात कार्यरत असलेले तत्कालीन पोलीस निरीक्षक अभय कुरुंदकर यांना अटक करण्यात आली होती. तब्बल ९ वर्षांनंतर या प्रकरणाचा निकाल लागला आहे. या प्रकरणातील कुंदन भंडारी आणि महेश पाटील हे गेल्या काही वर्षांपासून अटकेत असून त्यांनी ही शिक्षा अगोदरच भोगली असल्याने त्यांची सुटका होणार आहे.
—————
