सातारा : सोलापूर महापालिकेचे उपायुक्त अभिजित बापट यांची सातारा पालिकेच्या मुख्याधिकारीपदी वर्णी लागली आहे. अवघ्या महिनाभरात मुख्याधिकारी रंजना गगे यांच्या बदलीमुळे आश्चर्य व्यक्त होत आहे. तर सोलापूर महापालिका उपायुक्तपदी नियुक्ती होऊनही बापट यांनी पदभार घेतला नाही.
मुख्याधिकारी शंकर गोरे यांच्या बदलीनंतर दोन जुलै रोजी रंजना गगे सातारा पालिकेच्या मुख्याधिकारी पदाचा भार सांभाळला होता. लक्ष्मीटेकडी परिसरात कायद्याचा बडगा दाखवून त्यांनी केलेल्या ऍण्टीजेन टेस्ट कामाची चांगलीच चर्चा झाली. त्यामुळे तेथील कोरोनाची साखळी तोडण्यात प्रशासनाला यश आल्याचे सांगितले जात आहे.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
प्रशासकीय कारभाराचे गाडे सुरळीत करत असताना रंजना गगे यांच्या जागी सोलापूर महापालिकेचे उपायुक्त म्हणून अभिजित बापट यांची प्रशासकीय बदली झाल्याचे नगरविकास विभागाकडून लेखी पत्र काल मंगळवारी सायंकाळी प्राप्त झाले. 2012 ते 16 या चार वर्षात बापट यांनी आधी साताऱ्यात नगर प्रशासन अधिकारी म्हणून आणि त्यानंतर तीन वर्ष सातारा पालिका मुख्याधिकारी म्हणून सेवा बजावली होती.
खासदार उदयनराजे भोसले व आमदार शिवेंद्रसिंहराजे भोसले यांच्याशी उत्तम समन्वय असणारे मुख्याधिकारी म्हणून अभिजित बापट यांची ओळख आहे. मुख्याधिकारी गगे यांच्या प्रशासकीय सेवेचे 22 महिने शिल्लक होते. त्यांनी सुद्धा पुणे विभागात बदली मिळावी, यासाठी विनंती अर्ज नगर विकास विभागाकडे केला होता.
