चंडीगढ़, १३ जून (हिं.स.) : पंजाबमधील पठाणकोटच्या नंगलपूर पोलीस ठाण्याच्या हद्दीत असलेल्या हलेड गावात भारतीय वायूदलाच्या अपाचे हेलिकॉप्टरची आपत्कालीन लँडिंग करण्यात आली. सुदैवाने या घटनेत कोणतीही जीवितहानी किंवा मालमत्तेचे नुकसान झालेले नाही.
हे हेलिकॉप्टर पठाणकोट वायूदलाच्या तळावरून सरावासाठी उड्डाण करत होते. मात्र, उड्डाणादरम्यान तांत्रिक अडचणी आल्यामुळे खबरदारीचा उपाय म्हणून मोकळ्या मैदानात लँडिंग करण्यात आले.
हेलिकॉप्टर उतरल्याची माहिती मिळताच परिसरातील ग्रामस्थ घटनास्थळी जमा झाले. मात्र सुरक्षारक्षकांनी त्वरित परिसराची नाकेबंदी केली आणि सुरक्षिततेची काळजी घेतली.
घटनास्थळी उपस्थित वरिष्ठ अधिकाऱ्यांनी सुरक्षा प्रोटोकॉलचा हवाला देत यावर भाष्य करण्यास नकार दिला. तसेच नागरिकांच्या सुरक्षेस कोणताही धोका नसल्याचे सांगितले.
विशेष म्हणजे, एका आठवड्यात अपाचे हेलिकॉप्टरची ही दुसरी आपत्कालीन लँडिंग आहे. यापूर्वी उत्तर प्रदेशातील सहारनपूर जिल्ह्यात ६ जून रोजी देखील अशाच प्रकारे तांत्रिक बिघाडामुळे अपाचे हेलिकॉप्टरची लँडिंग करण्यात आली होती.
