नांदेड, 13 ऑगस्ट – जिल्ह्यातील सर्व शासनमान्य अनुदानित, विनाअनुदानीत आणि कायम विनाअनुदानीत महाविद्यालयांमध्ये 2025-26 शैक्षणिक वर्षात प्रवेश घेतलेल्या अनुसूचित जातीच्या विद्यार्थ्यांनी शिष्यवृत्तीचे नवीन व नूतनीकरण अर्ज भरण्यासाठी महाडिबीटी (MAHADBT) पोर्टलचा लाभ घ्यावा, असे आवाहन समाज कल्याण सहाय्यक आयुक्त शिवानंद मिनगिरे यांनी केले आहे. हे पोर्टल 30 जूनपासून सुरू झाले आहे.
सामाजिक न्याय व विशेष सहाय्य विभागांतर्गत समाज कल्याण सहाय्यक आयुक्त कार्यालयामार्फत राबविल्या जाणाऱ्या भारत सरकार मॅट्रिकोत्तर शिष्यवृत्ती, शिक्षण शुल्क व परीक्षा शुल्क प्रतिपूर्ती योजना, व्यावसायिक पाठ्यक्रमांसाठी निर्वाह भत्ता, राजर्षी शाहू महाराज गुणवत्ता शिष्यवृत्ती आणि स्वाधार योजना याबाबत जिल्ह्यातील महाविद्यालयांच्या प्राचार्यांची बैठक आयोजित करण्यात आली होती. या बैठकीस जिल्ह्यातील महाविद्यालयांचे प्राचार्य व कर्मचारी उपस्थित होते.
बैठकीत 2024-25 या शैक्षणिक वर्षातील प्रलंबित अर्जांवर तात्काळ कार्यवाही करण्याचे निर्देश देण्यात आले. तसेच, अनुसूचित जाती प्रवर्गातील विद्यार्थ्यांमध्ये योजनांची जनजागृती करणे, स्वाधार योजनेसाठी विद्यार्थ्यांची उपस्थिती तपासून सादर करणे, महाविद्यालयाच्या नोटीस बोर्डवर संबंधित नोटीस लावणे, अंतर्गत लेखापरीक्षण अहवाल तात्काळ सादर करणे आणि सर्व शिष्यवृत्ती योजनांचे अर्ज वेळेत निकाली काढणे याबाबत सूचनाही देण्यात आल्या.
