वॉशिंग्टन, 15 ऑक्टोबर। अमेरिकेतील भारतीय वंशाचे प्रमुख राष्ट्रीय सुरक्षा तज्ज्ञ आणि दक्षिण आशिया धोरण सल्लागार एशले टेलिस यांना चीनशी कथित संबंध आणि गोपनीय सरकारी दस्तऐवज बाळगल्याप्रकरणी अटक करण्यात आली आहे. टेलिस यांच्यावर राष्ट्रीय संरक्षणासंबंधी गोपनीय दस्तऐवज बेकायदेशीरपणे जवळ बाळगण्याचा आणि चिनी सरकारी अधिकाऱ्यांशी अनेक वेळा भेटी घेतल्याचा आरोप ठेवण्यात आला आहे. ही माहिती एफबीआयने दाखल केलेल्या शपथपत्रातून समोर आली आहे.
अहवालानुसार, एशले टेलिस यांनी 2022 पासून आतापर्यंत अनेक वेळा चिनी अधिकाऱ्यांशी बेकायदेशीरपणे गुप्त बैठक घेतल्या. या काळात त्यांनी काही संवेदनशील दस्तऐवज आपल्या जवळ ठेवल्याचेही समोर आले आहे. एफबीआयने शनिवारी व्हर्जिनियाच्या वियेना येथील टेलिस यांच्या निवासस्थानी छापा टाकला, जिथे ‘टॉप सिक्रेट’ दर्जाचे दस्तऐवज टेलिस यांच्या ऑफिसमधील बंद फाइलिंग कॅबिनेट्स, एक डेस्क आणि तीन मोठ्या कचऱ्याच्या पिशव्यांमध्ये सापडले.
व्हर्जिनियामधील एका न्यायालयात दाखल केलेल्या एफबीआयच्या शपथपत्रात टेलिस यांच्याविरुद्ध अनेक आरोप करण्यात आले आहेत. या दस्तऐवजात नमूद करण्यात आले आहे की, सप्टेंबर 2022 ते सप्टेंबर 2024 दरम्यान, टेलिस यांनी व्हर्जिनियातील फेअरफॅक्स शहरात असलेल्या विविध रेस्टॉरंट्समध्ये चिनी सरकारी अधिकाऱ्यांशी अनेक वेळा गुप्त बैठक घेतल्या. टेलिस यांच्या व्हर्जिनियातील निवासस्थानातून एक हजार पानांचे गोपनीय दस्तऐवज देखील जप्त करण्यात आले आहेत.
प्रतिष्ठित कारकीर्द
एशले टेलिस यांचा जन्म भारतात झाला असला, तरी ते अमेरिकेचे नागरिक आहेत. ते 2001 पासून अमेरिकेच्या परराष्ट्र विभागाचे सल्लागार होते आणि अमेरिका-भारत नागरी अणु कराराचे प्रमुख वाटाघाटीदार होते. सध्या ते डिपार्टमेंट ऑफ डिफेन्सच्या ऑफिस ऑफ नेट असेसमेंटमध्ये कार्यरत आहेत आणि कार्नेगी एंडॉमेंट फॉर इंटरनॅशनल पीस येथे वरिष्ठ फेलो म्हणून कार्यरत आहेत. ते माजी राष्ट्रपती जॉर्ज डब्ल्यू. बुश यांचे विशेष सहाय्यक आणि नॅशनल सिक्योरिटी कौन्सिलमध्ये रणनीतिक योजना आणि दक्षिण-पश्चिम आशिया व्यवहारांचे वरिष्ठ संचालक देखील राहिले आहेत.
