नागपूर, ५ ऑगस्ट – केंद्रीय मंत्री नितीन गडकरी यांच्या ताफ्यात जबरदस्तीने घुसण्याचा प्रयत्न करत, एका व्यक्तीने महिला वाहतूक पोलिसावर रस्त्यावरच हल्ला करत तिचा विनयभंग केल्याची धक्कादायक घटना नागपुरात घडली. गर्दीच्या ठिकाणी घडलेल्या या प्रकारामुळे परिसरात मोठी खळबळ उडाली आहे. ही घटना सोमवार, ४ ऑगस्ट रोजी संध्याकाळी लकडगंज पोलीस ठाण्याच्या हद्दीत घडली.
मिळालेल्या माहितीनुसार, सोमवारी संध्याकाळी केंद्रीय मंत्री नितीन गडकरी यांचा ताफा आझमशाह चौकातून शांतीनगरकडे जात असताना, वाहतूक सुरळीत राहावी म्हणून पोलिस बंदोबस्त तैनात करण्यात आला होता. संध्याकाळी सुमारे ६.४५ वाजता दहीबाजार पुलाजवळ दोन महिला वाहतूक पोलीस कर्मचारी कर्तव्यावर होत्या.
त्याचवेळी सैय्यद सज्जाद मुजफ्फर अली (राहणारा – कश्यप कॉलनी, शांतीनगर) हा इसम मालधक्क्याकडून येत होता आणि रस्ता ओलांडण्याचा प्रयत्न करत होता. महिला पोलिसांनी त्याला थांबवले आणि सांगितले, “व्हीआयपी ताफा जात आहे, थांबा.” त्यामुळे संतप्त झालेल्या सैय्यदने महिला पोलिसाला शिवीगाळ केली, धक्काबुक्की करत मारहाण केली.
ताफा निघून गेल्यानंतरही तो थांबला नाही. त्याने महिला पोलिसाच्या अंगावरील शर्ट ओढत तिचा विनयभंग केला आणि तिला ओढत ‘ब्रिज व्ह्यू हॉटेल’पर्यंत नेले. गर्दी असतानाही तो शिवीगाळ आणि मारहाण करत राहिला.
घटनेची माहिती मिळताच इतर पोलीस कर्मचाऱ्यांनी आणि काही नागरिकांनी हस्तक्षेप केला. मात्र पोलिसांना पाहताच सैय्यदने गर्दीचा फायदा घेत पळ काढला. नागरिकांनी त्याची ओळख पोलिसांना सांगितली.
या प्रकरणी संबंधित महिला पोलीस कर्मचाऱ्याने लकडगंज पोलीस ठाण्यात तक्रार दाखल केली असून, वरिष्ठ पोलीस अधिकारी घटनास्थळी दाखल झाले आहेत. आरोपीविरुद्ध गुन्हा दाखल करण्यात आला आहे.
