मुंबई, 7 जुलै (हिं.स.)। राष्ट्रवादी काँग्रेसचे नेते आणि माजी आमदार बाबा सिद्दीकी यांच्या हत्येनंतर त्यांच्या मोबाईल क्रमांकाचा गैरवापर करून फसवणुकीचा प्रयत्न करण्यात आल्याचा धक्कादायक प्रकार उघडकीस आला आहे. या प्रकरणी वांद्रे पोलिसांनी दिल्लीच्या बुराडी परिसरातून एका संशयिताला अटक केली आहे. पोलिसांच्या माहितीनुसार, आरोपीने बनावट कागदपत्रांच्या आधारे हा मोबाईल क्रमांक दुसऱ्या सिमकार्डवर सुरू करण्याचा कट रचला होता.
गेल्या वर्षी विजयादशमीच्या दिवशी, वांद्रे येथील खेरवाडी परिसरात भरदिवसा गोळीबार करत लॉरेन्स बिश्नोई टोळीशी संबंधित गुंडांनी बाबा सिद्दीकी यांची निर्घृण हत्या केली होती. या घटनेमुळे संपूर्ण मुंबईत खळबळ उडाली होती. हत्येनंतर पोलिसांनी मारेकऱ्यांपैकी काही जणांना अटक केली असली तरी, हत्येचा सूत्रधार कोण होता याचा तपास अद्याप सुरूच आहे.
दरम्यान, या प्रकरणात आता सायबर फसवणुकीचा धागा समोर आला आहे. बाबा सिद्दीकी यांच्या हत्येनंतर त्यांचा मोबाईल क्रमांक त्यांच्या कुटुंबियांनी व्यवसायासाठी सुरू ठेवला होता. मात्र, २४ जून रोजी त्यांच्या पत्नी शेहझीन सिद्दीकी यांच्या नावाने मोबाईल सेवा प्रदाता कंपनीला एक ई-मेल पाठवण्यात आला, ज्यात मोबाईल क्रमांक ट्रान्सफरसाठी अधिकृत स्वाक्षरी हक्काची माहिती मागवण्यात आली होती.
या ई-मेलसोबत शेहझीन सिद्दीकी यांचे आधार कार्ड, पॅन कार्ड, जीएसटी क्रमांक तसेच त्यांच्या कंपनीचे लेटरहेड वापरून अर्ज करण्यात आला होता. ही माहिती पाहून मोबाईल कंपनीने संबंधित अर्ज प्राप्त झाल्याचे ई-मेलद्वारे कळवले आणि त्या ई-मेलची सीसी सिद्दीकी यांची मुलगी डॉ. अर्शिया यांनाही पाठवण्यात आली. त्यामुळे हा प्रकार फसवणुकीचा असल्याचे कुटुंबियांच्या लक्षात आले.
यानंतर डॉ. अर्शिया सिद्दीकी यांनी वांद्रे पोलीस ठाण्यात तक्रार दाखल केली. तपासादरम्यान पोलिसांनी दिल्लीतील बुराडी परिसरातील आरोपीला ताब्यात घेतले, ज्याच्यावर यापूर्वीही सायबर फसवणुकीचे गुन्हे दाखल आहेत. मुंबईतही आरोपीविरुद्ध दोन गुन्हे दाखल असून, एक प्रकरण मुख्य दंडाधिकारी न्यायालय क्रमांक ३७, आणि दुसरे बोरीवली न्यायालय क्रमांक १७ येथे सुरू आहे. बोरीवलीतील प्रकरणात आरोपीला जामीन मिळाला होता.
या प्रकरणी वांद्रे पोलिसांनी आरोपीविरोधात भारतीय न्याय संहितेच्या कलम ३१९(२) (फसवणूक करणे), ६२ (कैदेस पात्र असलेल्या गुन्ह्याचा प्रयत्न), ३३५ (खोटे दस्तऐवज तयार करणे), ३३६ (२) व ३३६ (३) (दस्तऐवजांचे बनावटीकरण), आणि ३४०(२) (बनावट इलेक्ट्रॉनिक नोंदी खऱ्या असल्याचे भासवणे) या कलमांअंतर्गत गुन्हा दाखल केला आहे.
बाबा सिद्दीकी यांच्या हत्या प्रकरणातील हा नवा धागा सायबर फसवणुकीशी जोडला गेल्यामुळे पोलिसांचा तपास आणखी व्यापक करण्यात येणार आहे. आरोपीने हे कृत्य कोणाच्या सांगण्यावरून केले, त्यामागे अजून कोणी आहे का, हे तपासाचे पुढील टप्प्यात स्पष्ट होईल.
