बीड, 4 सप्टेंबर। कौटुंबिक वादातून पत्नीने पतीला लाथा-बुक्क्यांनी केलेल्या मारहाणीत अवघड जागी मार लागल्याने दिव्यांग पती कैलास सरवदे (वय ३७) यांचा मृत्यू झाल्याची घटना अंबाजोगाई शहरातील क्रांतीनगर भागात घडली असल्याची माहिती हाती आली आहे. या प्रकरणी पत्नीवर अंबाजोगाई शहर ठाण्यात सदोष मनुष्यवधाचा गुन्हा दाखल करण्यात आला आहे.
कैलास यांची बहीण ज्योती तरकसे यांनी अंबाजोगाई शहर पोलिस ठाण्यात दिलेल्या फिर्यादीनुसार, कैलास सरवदे यांचे लग्न सात वर्षांपूर्वी माया हिच्याशी झाले होते. मायाचे हे दुसरे लग्न आहे. पहिल्या पतीपासून तिला दोन मुली, तर कैलासपासून एक मुलगा आणि एक मुलगी आहे.
कैलास हा दिव्यांग आणि दारू पिण्याच्या सवयीचा असल्याने त्याचे पत्नीबरोबर वाद होत होते. माया ही कैलास याला नेहमी उपाशी ठेवत असे. याप्रकरणी अंबाजोगाई शहर पोलीस ठाण्यात माया सरवदे हिच्यावर बीएनएस कलम १०५ अन्वये गुन्हा दाखल करण्यात आला आहे. पुढील तपास पीएसआय रविकुमार पवार करीत आहेत.
