मुंबई, २७ मे: मुंबई विमानतळावर मंगळवारी सकाळी बॉम्बस्फोटाची धमकी मिळाल्यानंतर खळबळ उडाली. सकाळी ९ च्या सुमारास मुंबई पोलिसांच्या नियंत्रण कक्षाला आलेल्या एका अज्ञात दूरध्वनीत छत्रपती शिवाजी महाराज आंतरराष्ट्रीय विमानतळ उडवून देण्याची धमकी दिली गेली. यानंतर विमानतळावरील सुरक्षाव्यवस्था अधिकच कडक करण्यात आली असून, सर्व संबंधित यंत्रणा तात्काळ सतर्क झाल्या.
विमानतळ प्राधिकरणाने मिळालेली माहिती पोलीस, सीआयएसएफ व इतर सुरक्षा यंत्रणांना दिल्यानंतर संबंधित विमानाची झडती घेण्यात आली. मात्र, तपासात काहीही संशयास्पद आढळले नाही. दरम्यान, धमकी देणाऱ्या व्यक्तीचा शोध घेण्यासाठी साकीनाका पोलिसांनी तांत्रिक विश्लेषणासह तपास सुरू केला. धमकीचा फोन करणारा इसम अंधेरी परिसरात असल्याचे समोर आले.
पोलीस तपासात संशयित मनजीत कुमार गौतम (३५) याला अंधेरीतील एका कपड्यांच्या कारखान्यातून ताब्यात घेतले. सध्या त्याची चौकशी सुरू असून, त्याला सहार पोलिसांच्या ताब्यात देण्यात आले आहे.
गेल्या वर्षीपासून देशभरात अशा धमक्यांचे सत्र सुरू असून, बहुतांश धमक्या खोट्या असल्याचे समोर आले आहे. त्यामुळे सुरक्षा यंत्रणांनी बहुस्तरीय मूल्यांकन आणि माहितीच्या स्रोतांच्या विश्वासार्हतेवर लक्ष केंद्रित करण्याचा निर्णय घेतला आहे.
