सोलापूर : सिमेंट घेऊन वाहतूक करणा-या मालट्रक चालकाला पहाटे चांगलीच झोपेची डुलकी लागली. अशात सोलापुरात प्रवेश करीत असताना झोप न आवरल्याने पुढे ट्रक कोरोनामुळे बॉर्डर सिलिंग गेलेल्या पोलिसाच्या नाकाबंदीतच घुसला. मात्र प्रसंगावधान साधल्याने पोलिसांसह इतरजणांनी बाजूला उडी ठोकली. त्यामुळे सुदैवाने मोठा अनर्थ टळला.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
हा प्रकार काल मंगळवारी नवीन हैदराबाद नाका येथे पहाटे तीन वाजण्याच्या सुमारास घडला. मालट्रक काही अंतरावर असलेल्या लोखंडी बॅरिकेड्सला धडकून खुर्चीवर बसलेल्या पोलिसांच्या दिशाने आला. पोलिसांनी रस्त्यावरून उड्या मारत मंडपाच्या दिशेने धाव घेतल्याने त्यांचा जीव वाचला. चालक अवधूत लक्ष्मण बंडगर (वय 40 रा. सोलापूर) यास लागलीच पोलिसांनी धावून ताब्यात घेतले. त्याच्याविरुद्ध एमआयडीसी पोलीस ठाण्यात गुन्हा दाखल करण्यात आला आहे.
चालकाकडे चौकशी केली असता त्याने अचानक झोप लागली होती, असे सांगितले. हा प्रकार अत्यंत भीतीदायक होता, कर्तव्यावर असलेले पोलीस कर्मचारी व अन्य कोविड वॉरियर्स घाबरले होते. सुदैवाने काही झालं नाही, अन्यथा मोठा अनर्थ झाला असता, असे एमआयडीसी पोलीस ठाण्याचे पोलीस निरीक्षक सूर्यकांत पाटील यांनी सांगितले.
नवीन हैदराबाद नाका येथे एमआयडीसी पोलिस ठाण्याचे एक फौजदार, सहा पोलीस कर्मचारी, तालुका पोलिस स्टेशनचे दोन पोलिस कर्मचारी, चार होमगार्ड, एक शिक्षक व एक परिवहन विभागाचे कर्मचारी असे एकूण पंधराजण हा अपघात होण्यापासून सुदैवाने बचावले आहेत.
हैदराबाद रोडच्या दिशेने येणा-या मालट्रकचा अचानक मोठा प्रकाश पडला. मालट्रक मंडपाच्या बांबूला धडकत सरळ निघून गेली, पुढे असलेल्या दुस-या लोखंडी बॅरिकेटला धडकली. एवढ्यावरही मालट्रक थांबली नाही ती वेगाने पुढे जात होती, मात्र लोखंडी बॅरिकेट्सना खाली अडकल्यामुळे ट्रकचालकास जाग आली आणि त्याने लागलीच ट्रक थांबवला. कर्तव्यावर असलेल्या पोलिसांनी लागलीच मालट्रकच्या पाठीमागे धावून चालकाला ताब्यात घेतले.
मालट्रक मंडपामध्ये घुसला असता तर मोठा अनर्थ झाला असता चालक अवधूत बंडगर हा सिमेंटचा माल घेऊन सोलापूरला येत होता. १४ चाकी टायर असलेला हा मोठा मालट्रक जर रस्त्याच्या कडेला असलेला लहान सिमेंटचा गार्डन सोडून मंडपामध्ये असला असता तर मोठा अनर्थ घडला असता. मालट्रक मंडपाच्या बांबूला घासत पुढे गेला त्यामध्ये मंडपावर लावण्यात आलेले लाईटचे व दोन्ही लोखंडी बॅरिकेड्सचे नुकसान झाले.
