नवी दिल्ली, 26 मे (हिं.स.) : ऑपरेशन सिंदूरनंतर देशभरात गद्दारांच्या मुसक्या आवळल्या जात असतानाच राष्ट्रीय तपास यंत्रणेने (एनआयए) केंद्रीय राखीव पोलिस दलाच्या (सीआरपीएप) सहायक उपनिरीक्षकाला अटक केली आहे. मोतीराम जाट असे त्‍याचे नाव आहे. मोतीराम 2023 पासून पाकिस्तान गुप्तचर अधिकाऱ्यांना माहिती देत असल्याचे उघड झाले आहे. ‘या कारवाईनंतर ‘सीआरपीएफ’ने त्याला सेवेतून बडतर्फ केले आहे.
आरोपी मोती राम जाट हा सीआरपीएफमध्‍ये सहाय्‍यक उपनिरीक्षक पदावर कार्यरत होता. हेरगिरीमध्‍ये तो सक्रिय होता. तो 2023 पासून पाकिस्तानी गुप्तचर अधिकाऱ्यांना (पीआयओ) राष्ट्रीय सुरक्षेशी संबंधित गोपनीय माहिती शेअर करत होता. याचा मोबदला म्‍हणून त्‍याने पाकिस्तानी गुप्तचर अधिकाऱ्यांकडून विविध मार्गांनी पैसा मिळवला होता.
मोती राम जाट याला पटियाला हाऊस कोर्टातील विशेष न्यायालयात हजर करण्यात आले. न्‍यायालयाने त्याला 6 जूनपर्यंत एनआयए कोठडी सुनावली आहे. पाकिस्तानला गोपनीय माहिती देत असल्याचे स्‍पष्‍ट झाल्‍यानंतर सीआरपीएफने सोमवारी जाट याला सेवेतून बडतर्फ केले.मोती राम जाट याच्‍या हालचाली संशयास्‍पद होत्‍या. यामुळे सीआरपीएफ कर्मचाऱ्यांनी केंद्रीय तपास संस्थांशी समन्वय साधून त्‍याच्‍या सोशल मीडियावरील संदेशाची तपासणी केली. यावेळी त्‍याने नियमांचे उल्‍लंघन केल्‍याचे आढळले, पुढील चौकशीसाठी त्याला राष्ट्रीय तपास संस्थेकडे (एनआयए) सोपवण्यात आले. सीआरपीएफ नियमानुसा त्‍याा 21 मे 2025 पासून सेवेतून बडतर्फ करण्यात आल्याचे सीआरपीएफने सांगितले.
पहलगाममध्‍ये झालेल्‍या दहशतवादी हल्‍ल्‍यानंतर देशभरातील विविध राज्‍यांना सतर्कचे आदेश देण्‍यात आले होते. मागील आठवड्यात, पंजाब, हरियाणा, गुजरात आणि उत्तर प्रदेशमधील पोलिस दलांनी संवेदनशील माहिती लीक करण्यापासून ते बेकायदेशीर मार्गांनी गुप्तचर माहिती गोळा करण्यात सहभागी असलेल्या पाकिस्तानी नागरिकांशी संबंध ठेवण्यापर्यंतच्या आरोपांवर किमान 14 जणांना अटक केली आहे
