मुंबई – उपमुख्यमंत्री एकनाथ शिंदे यांनी मंगळवारी हाऊसमध्ये आक्रमक होवून शिवसेनेचे उद्धव ठाकरे गटाचे प्रमुख उद्धव ठाकरे यांच्यावर टीकेची झोड उठवली.विधानसभा निवडणुकीच्या प्रचारानंतर पहिल्यांदाच शिंदे यांनी ठाकरे यांना अनेक मुद्यांवर आडवे तिडवे घेतले.संतप्त होवून त्यांनी ठाकरे यांची भर सभागृहात लाजच काढली.पक्षप्रमुख म्हणून मी पाचवेळा भाजपशी युती करण्याचा सल्ला दिला पण ठाकरे ऐकले नाहीत.सत्तेच्या खुर्चीसाठी बाळासाहेबांचे विचार सोडले, औरंग्याचे विचार धरत खुर्ची मिळवली. त्याामुळे या लोकांना हिंदुत्वाावर बोलण्याचा अधिकार नाही. उद्धव ठाकरेही भाजपाकडे गेले आपण युती सरकार स्थापन करू असे म्हटले परंतु इथे आल्यावर पलटी मारली असा गौप्यस्फोट शिंदे यांनी केला.माझ्या अस्तित्वाला चॅलेंज देवू नका,असा निर्वाणीचा इशाराही शिंदे यांनी ठाकरेंना दिला.
औरंगजेबासारखा माझा छळ झाला असे विधान अनिल परब यांनी केले होते. यावरून विधान परिषदेत एकनाथ शिंदे यांनी उद्धव ठाकरेंसह अनिल परबांवर जोरदार निशाणा साधला. यावेळी दोन्ही बाजूने गोंधळ सुरू होता. त्यातच शिंदे म्हणाले की, भाजपाचे देवेंद्र फडणवीस, गिरीश महाजन, आशिष शेलार आणि प्रवीण दरेकर या चौघांना जेलमध्ये टाकणार होते. जेलमध्ये टाकून भाजपाचे आमदार फोडून त्यांना महाविकास आघाडीत घेणार होते. मी यांचा डाव मोडला, यांचा टांगा पलटी करून टाकला आणि महायुतीचे सरकार आणले असे ते म्हणाले.
तसेच औरंगजेबाचे विचार तुम्ही स्वीकारले. सत्तेसाठी लाचार झाले. एकनाथ शिंदेने धाडस केले. शिवसेना वाचवली, धनुष्यबाण वाचवला म्हणून 80 पैकी 60 जागा आमच्या आल्या. तुम्ही 100 जागा लढवून फक्त 20 आल्या. तुम्हाला जनतेने धडा शिकवला आहे. जनतेने तुमची जागा दाखवली आहे. लोकसभा निवडणुकीत रॅलीत पाकिस्तानी झेंडे नाचवले. तुम्हाला लाज वाटली पाहिजे. मी धाडस केले आणि हिंदुत्वाचे सरकार आणले. बाळासाहेबांच्या विचारांचे सरकार आणले. अडीच वर्ष महायुती सरकार म्हणून काम केले. त्यामुळे निवडणुकीनंतर तुमचे विरोधी पक्षनेतेपदही गेले असा खोचक टोला शिंदे यांनी ठाकरे गटाला लगावला.
उद्धव ठाकरे नरेंद्र मोदींना भेटले, मला माफ करा, आम्ही पुन्हा येतो असं सांगितले. त्याानंतर इथं आल्यानंतर पलटी मारली. अनिल परबही गेले होते. तुम्हाला नोटीस आली तेव्हा तुम्हीही गेलात, मला सोडवा असे म्हटले होते. आम्ही जे काही केले खुलेआम केले. लपून छपून गेलो नाही. शिवसेना, धनुष्यबाण धोक्यात आले तेव्हा आम्ही सरकार पलटी केले. तुमचा टांगा पलटी केला. हे करायला वाघाचे काळीज लागते. वाघाचे कातडं पांघरून लांडगा वाघ होऊ शकत नाही असा हल्ला शिंदे यांनी उद्धव ठाकरेंवर केला.
मला डिवचू नका…
अनिल परब तुमचा इतिहास मला माहिती आहे. मी कधीही कमरेखालचा वार करत नाही. कोण कुठे गेला कशाला गेला हे माहिती आहे. मी तुमच्या पक्षप्रमुखाला 5 वेळा सांगितले, शिवसेना-भाजपा युती करा. मुख्यमंत्रिपदाच्या खुर्चीचा इतका मोह का झाला? आम्ही सत्तेवर लाथ मारली. मला आतलं सगळं माहिती आहे. कुणाची नोटीस थांबवायला काय काय केले मला माहिती आहे. मला डिवचू नका, माझ्या अस्तित्वाला चॅलेंज करू नका, मी जे केले जगाने पाहिले असे सांगत शिंदेंनी ठाकरे गटाला सूचक इशारा दिला.
