बलात्कार प्रकरणात विशेष न्यायालयाने ठोठावली शिक्षा
बंगळुरू, 02 ऑगस्ट – बलात्काराच्या प्रकरणात दोषी ठरलेले जनता दल (सेक्युलर) चे माजी खासदार प्रज्वल रेवन्ना यांना शनिवारी जन्मठेपेची शिक्षा सुनावण्यात आली. कर्नाटकच्या मैसूर येथील केआर नगरमधील एका घरगुती कामगार महिलेने त्यांच्या विरोधात तक्रार दाखल केली होती.
कर्नाटकातील विशेष न्यायालयाने हे प्रकरण हाताळले. विशेष न्यायमूर्ती संतोष गजानन भट यांनी शिक्षा सुनावली. प्रज्वल रेवन्ना यांच्यावर बलात्काराचे 4 वेगवेगळे गुन्हे दाखल आहेत. पीडित महिला हसन जिल्ह्यातील देवेगौडा कुटुंबाच्या ‘गन्निकाडा फार्महाऊस’वर घरकाम करत होती. माजी पंतप्रधान एच.डी. देवेगौडा यांचे नातू असलेले प्रज्वल रेवन्ना यांनी 2021 मध्ये हसनमधील फार्महाऊस आणि बंगळुरूमधील त्यांच्या घरी या महिलेसोबत दोन वेळा बलात्कार केला होता. त्यांनी हे कृत्य मोबाईलमध्ये चित्रीत करून ठेवले होते आणि जर कुणाला सांगितले तर व्हिडिओ लीक करण्याची धमकी दिली होती.
विशेष सरकारी वकील अशोक नायक यांनी सांगितले की, सरकारी पक्षाने 26 साक्षीदारांचे जबाब नोंदवले आणि 180 कागदपत्रे सादर केली. मुख्य पुरावा पीडितेचा होता, जो अत्यंत विश्वासार्ह ठरला. विशेष तपास पथकाने (एसआयटी) सप्टेंबर 2024 मध्ये 1632 पानांचे आरोपपत्र दाखल केले होते, ज्यामध्ये 113 साक्षीदारांचे जबाब होते.
लोकसभा निवडणुकीपूर्वी 26 एप्रिल 2024 रोजी हसन येथे प्रज्वल रेवन्ना यांच्याशी संबंधित अश्लील व्हिडिओ असलेला पेन-ड्राईव्ह प्रसारित झाला होता. प्रज्वल रेवन्ना यांना 31 मे 2024 रोजी जर्मनीहून बंगळुरू विमानतळावर आल्यानंतर होलेनरसीपुरा पोलिसांनी अटक केली होती. गेल्या लोकसभा निवडणुकीत ते हसन मतदारसंघातून पराभूत झाले होते. त्यांच्याविरुद्ध गुन्हे दाखल झाल्यानंतर जेडीएस पक्षाने त्यांना निलंबित केले होते.
