बनावट कागदपत्रे,शॉपॲक्ट लायसन तयार करून ५८ लाखांची फसवणूक
सोलापूर (प्रतिनिधी) काबरा अँड कंपनी या फर्मच्या नावाचे बनावट कागदपत्र शॉप ॲक्ट लायसन तयार करून त्यावर स्वतः मालक असल्याचे दर्शवून ऑफिस मधील शिक्के व लेटर पॅड चा वापर करून ५८ लाख ११ हजार ४२ रुपयांची फसवणूक केल्याची घटना उघडकीस आली आहे.ही घटना १६ जुलै २०२१ रोजी ते दि.४ एप्रिल २०२४ दरम्यान फलटण गल्ली निरगुडे कॉम्प्लेक्स पश्चिम मंगळवार पेठ सोलापूर येथे घडली.याप्रकरणी नंदकिशोर रामनिवासजी काबरा (वय-६२,रा.बुधवार पेठ,श्राविका शाळेजवळ,सोना हिरा चौक) यांनी जोडभावी पेठ पोलीस ठाण्यात फिर्याद दाखल केली आहे.त्यांच्या फिर्यादीवरून लक्ष्मण भीमाशंकर कोनाळे (रा.मल्लिकार्जुन नगर,अक्कलकोट रोड) याच्याविरुद्ध गुन्हा दाखल झाला आहे.
याबाबत अधिक माहिती अशी की,फिर्यादी यांच्या वरील फर्मच्या नावाचे बनावट कागदपत्र शॉप ॲक्ट लायसन तयार करून स्वतः मालक असल्याचे दर्शवून व ऑफिस मधील शिक्के व लेटर पॅड चा वापर करत कर्नाटक बँक शिवाजी चौक सोलापूर या बँक मध्ये दिनांक १६ जुलै २०२१ रोजी स्वतःच्या नावाचे चालू खाते उघडून फिर्यादी यांचे खातेदार यांनी फिर्यादीच्या कामाची फी म्हणून एन आर काबरा अँड कंपनी या नावाने दिलेला चेक रक्कम १३ लाख ४७ हजार ३३३ रुपये इतकी कर्नाटक बँक मधील खात्यामध्ये जमा करून ती काढून घेऊन फिर्यादींची फसवणूक केली आहे.
त्याचप्रमाणे १५ मार्च २०२३ ते ४ एप्रिल २०२४ पर्यंत फिर्यादींच्या खातेदारांनी इन्कम टॅक्स जीएसटी भरणा कामाकरिता वरील संशयित आरोपी यांना दिलेली रक्कम भरणा न करता खातेदारांना बनावट चलन भरणा केलेली पावती देऊन ती रक्कम स्वतःच्या फायदा करिता वापरून खातेदारांची देखील फसवणूक केली आहे.तसेच खाते रकमांच्या ठिकाणी परस्पर खाते क्रमांक बदलून त्या ठिकाणी स्वतःचे व मित्र श्रीकांत मसळे,आनंद म्हंता यांचे खाते क्रमांक जोडून त्या खात्यावर फिर्यादीच्या खाते क्रमांकचा खातेदारांचा येणारा आयकर परतावा स्वतःच्या फायदा करिता स्वतःच्या खात्यावर ४४ लाख ६३ हजार ७०४ रुपये ट्रान्सफर करून घेऊन फिर्यादी यांची व फिर्यादीच्या खातेदारांची एकूण ५८ लाख ११ हजार ४२ रुपये इतकी रक्कम काढून घेऊन फसवणूक केल्याचे फिर्यादीत म्हटले आहे.या घटनेचा पुढील तपास सहाय्यक पोलीस निरीक्षक गायकवाड हे करित आहे.
