पुणे, 6 सप्टेंबर – ऐन गणेश विसर्जनाच्या पूर्वसंध्येला पुण्यामध्ये सणाला गालबोट लागले. माजी नगरसेवक वनराज आंदेकर यांच्या हत्येचा बदला म्हणून आरोपी गणेश कोमकरच्या मुलाची गोळ्या झाडून हत्या करण्यात आल्याची शक्यता वर्तवण्यात येत आहे. अवघ्या १९ वर्षीय आयुष कोमकरवर शुक्रवारी रात्री दोघांनी अंदाधुंद गोळीबार केला. तीन गोळ्या लागल्यामुळे गंभीर जखमी झालेल्या आयुषचा जागीच मृत्यू झाला. या घटनेमुळे पुण्यात खळबळ उडाली आहे. या प्रकरणाचा पुणे पोलिसांकडून कसून तपास सुरू आहे.
दरम्यान आज, शनिवारी पुण्याचे पोलिस उपायुक्त निखिल पिंगळे यांनी पत्रकार परिषद घेत आयुष कोमकर हत्या प्रकरणाबाबत माहिती दिली आहे. निखिल पिंगळे यांनी सांगितले की, आयुष गणेश कोमकर असं हत्या झालेल्या तरुणाचे नाव होते. आयुष क्लासवरून घरी येत असताना त्याच्यावर हल्ला करण्यात आला. प्राथमिक माहितीनुसार दोन अज्ञात व्यक्तींनी आयुषवर हल्ला केल्याची शक्यता आहे. आयुष हा वनराज आंदेकर हत्येतील आरोपी गणेश कोमकरचा मुलगा आहे. आयुष हा वनराज आंदेकरचा भाचा होता. या घटनेत ज्याचा सहभाग असेल, त्यावर कठोर कारवाई केली जाईल, असे पोलिस उपायुक्तांनी सांगितले. आरोपींच्या शोधासाठी गुन्हे शाखेची सहा पथके तयार करण्यात आली आहेत. मृताला न्याय देणं आमचे काम आहे. आता चुकीला माफी नाही, कोणताही गुन्हा करताना १०० वेळा विचार करा, असेही त्यांनी म्हटले आहे.
वनराज आंदेकर हा राष्ट्रवादीचा माजी नगरसेवक होता. त्याच्यावर 1 सप्टेंबर 2024 रोजी गोळ्या झाडून हत्या करण्यात आली होती. त्या प्रकरणी गणेश कोमकर सध्या तुरुंगात आहे. गेल्या काही दिवसांपासून वनराज आंदेकर यांच्या खुनाचा बदला घेतला जाणार असल्याची चर्चा सुरू होती. याबाबत पुण्यातील भारती विद्यापीठ पोलीस स्टेशन येथे कट रचल्याबाबत एकाला अटक केली होती आणि 6 लोकांवर गुन्हा दाखल करण्यात आलं होतं.
