सिंधुदुर्ग : आगामी जिल्हा बँक निवडणुकीच्या पार्श्वभूमीवर राष्ट्रवादी काँग्रेसचे सहकारातील नेते, जिल्हा बँक संचालक गुलाबराव चव्हाण यांनी आपल्या कार्यकर्त्यांसह विरोधी पक्षनेते देवेंद्र फडणवीस, खासदार नारायण राणेंच्या उपस्थितीत आज सोमवारी राणेंच्या मालवण येथील निलरत्न निवासस्थानी भाजपमध्ये प्रवेश केला.
या प्रवेशासाठी आमदार नितेश राणे यांनी खास प्रयत्न केले होते. या प्रवेशामुळे राष्ट्रवादीच्या सहकार क्षेत्राला खिंडार पडले आहे. जिल्ह्यातील सहकारातील बडा नेता भाजपमध्ये प्रवेश करणार असल्याची माहिती रविवारी रात्री उपलब्ध झाल्यापासून हा बडा नेता कोण ? याबाबत उत्सुकता लागली होती. जिल्हा बँक संचालक गुलाबराव चव्हाण राणेंच्या मालवण येथील निलरत्न निवासस्थानी दाखल झाल्यानंतर ही उत्सुकता संपुष्टात आली.
तुमच्या हक्काचे ‘सुराज्य डिजिटल’ फेसबुक पेज, ट्विटर, शेअरचॅट आणि ‘टेलिग्राम’वरही उपलब्ध
त्यांनी विरोधी पक्षनेते देवेंद्र फडणवीस, खासदार नारायण राणे यांच्या उपस्थितीत भाजपामध्ये प्रवेश केला. यावेळी आमदार नितेश राणे, माजी राज्यमंत्री आमदार रवींद्र चव्हाण, भाजपा जिल्हा अध्यक्ष राजन तेली, आमदार प्रसाद लाड, आमदार भाई गिरकर, आमदार रमेश पाटील, प्रदेश सचिव प्रमोद जठार, अतुल काळसेकर, अशोक सावंत, दिलीप रावराणे, संजय चव्हाण, राजू राऊळ, सुदेश आचरेकर, महिला जिल्हाध्यक्ष संध्या तेरसे, मालवण तालुका अध्यक्ष धोंडू चिंदरकर, दीपक पाटकर, विजय केनवडेकर, सुदेश आचरेकर, अजिंक्य पाताडे, राजू परुळेकर, बाबा परब यांच्यासह बहुसंख्य कार्यकर्ते पदाधिकारी उपस्थित होते.
गुलाबराव चव्हाण हे सहकार क्षेत्रातील जेष्ठ व्यक्तिमत्व आहे. सहकार महर्षी शिवराम जाधव यांच्या पासून ते राष्ट्रवादी पक्षात व जिल्हा बँकेच्या संचालक पदावर कार्यरत आहेत. जिल्हा बँकेच्या सत्तेत त्यांचा मोलाचा वाटा आहे. त्यामुळे गुलाबराव चव्हाण यांच्या भारतीय जनता पार्टीत झालेल्या प्रवेशामुळे जिल्हा बँकेच्या सत्ताधाऱ्यांना फार मोठा धक्का बसला आहे, अशी प्रतिक्रिया भाजप पदाधिकारी यांनी दिली आहे.
