मुंबई, 12 सप्टेंबर।एशिया कप 2025 मध्ये रविवारी भारत विरुद्ध पाकिस्तान सामना होणार आहे, आणि यासंदर्भात बरीच चर्चा रंगली आहे. पहलगाम हल्ल्यानंतर पहिल्यांदाच हे दोन संघ आमने-सामने येणार आहेत. भारताचे माजी क्रिकेटपटू हरभजन सिंग यांनी पुन्हा एकदा या सामन्याबद्दल आपली भूमिका मांडली आहे. त्यांनी सांगितले की, जेव्हा पर्यंत दोन्ही देशांमधील संबंध चांगले होत नाहीत, तोपर्यंत ना क्रिकेट खेळला जावा आणि ना व्यापार व्हावा.
मुंबईत आयोजित एका कार्यक्रमात हरभजन सिंग म्हणाले, “भारत-पाकिस्तान सामना नेहमीच चर्चेत राहतो, पण ऑपरेशन सिंदूरनंतर सगळ्यांनीच म्हटले की क्रिकेट आणि व्यापार दोन्ही बंद झाले पाहिजे. आम्ही वर्ल्ड चॅम्पियनशिप ऑफ लिजेंड्स खेळत होतो, पण आम्ही पाकिस्तानविरुद्धचा सामना खेळलो नाही.” पुढे हरभजन सिंग म्हणाले की, “प्रत्येकाची आपली विचारसरणी असते, पण माझ्या मते, जोपर्यंत दोन्ही देशांतील संबंध सुधारत नाहीत, तोपर्यंत क्रिकेट आणि व्यापार होऊ नये. पण ही माझी वैयक्तिक मते आहे. जर सरकार म्हणते की सामना होऊ शकतो, तर तो होऊ शकतो. पण दोन्ही देशांमधील नाते सुधरणे गरजेचे आहे.”
२२ एप्रिल रोजी झालेल्या पहलगाम हल्ल्यात अतिरेक्यांनी २६ भारतीय नागरिकांना ठार केले होते. या हल्ल्याचे धागेदोरे पाकिस्तानशी जोडले गेले होते, त्यामुळे भारतात शेजारी देशाबाबत संताप आहे. याआधी वर्ल्ड चॅम्पियनशिप ऑफ लिजेंड्समध्ये देखील भारतीय खेळाडूंनी पाकिस्तानविरुद्ध खेळण्यास नकार दिला होता.यावेळी भारत विरुद्ध पाकिस्तान सामन्याचा उत्साह तुलनेने कमी दिसतो आहे. याचे उदाहरण म्हणजे, पूर्वी जेव्हा या दोन संघांमधील सामना असायचा तेव्हा तिकीट काही तासांत विकले जायचे, पण यावेळी तसे घडलेले नाही. या सामन्यासाठी जवळपास सर्व स्टँडचे तिकीट अजूनही उपलब्ध आहेत.
