श्रीनगर, 23 एप्रिल (हिं.स.) : जम्मू-काश्मीरच्या पहलगाम येथे पर्यटकांवर झालेल्या दहशतवादी हल्ल्यानंतर, आज बुधवारी उत्तर काश्मीरमधील उरी येथे लष्कराच्या जवानांनी घुसखोरीचा प्रयत्न उधळून लावला. यादरम्यान झालेल्या चकमकीत 2 जिहादी दहशतवादी ठार झाले आहेत.
उत्तर काश्मीरमधील उरी सेक्टरमध्ये आज, बुधवारी 2 पाकिस्तानी जिहादी घुसखोरीचा प्रयत्न करत होते. मात्र, दहशतवाद्यांचा हा प्रयत्न लष्कराच्या जवानांनी हाणून पाडला आहे. सध्या येथे दहशतवादी आणि सैनिकांमध्ये चकमक सुरू आहे. यासंदर्भात भारतीय सैन्याने सांगितले की, बुधवारी जम्मू आणि काश्मीरमधील बारामुल्ला जिल्ह्यातील नियंत्रण रेषेवर (एलओसी) घुसखोरीचा प्रयत्न उधळून लावण्यात आला. ट्विटरवरील (एक्स) एका पोस्टमध्ये, चिनार कॉर्प्सने सांगितले की, 23 एप्रिल 2025 रोजी, सुमारे 2 ते 3 दहशतवाद्यांनी बारामुल्ला (उत्तर काश्मीरमधील) येथील उरी नाल्यातील सरजीवनच्या सामान्य भागातून घुसखोरी करण्याचा प्रयत्न केला.
दक्षिण काश्मीरमधील अनंतनाग जिल्ह्यातील पहलगाम येथे मंगळवारी (22 एप्रिल रोजी) झालेल्या प्राणघातक दहशतवादी हल्ल्याच्या 24 तासांपेक्षा कमी वेळात घुसखोरीचा हा प्रयत्न झाला. परंतु, सतर्क जवानांनी या घुसखोरांना कंठस्नान घातले.
