नवी दिल्ली , 26 मे (हिं.स.)। पाकिस्तानसाठी हेरगिरी केल्याच्या आरोपाखाली यूट्यूबर ज्योती मल्होत्रा सध्या तपास संस्थांच्या ताब्यात आहे. तिची कसून चौकशी केली जात आहे. एकीकडे तिची चौकशी केली जात असताना आता तिचा एक नवा व्हिडीओ समोर आला आहे. या व्हिडीओमध्ये ती तब्बल 6 बंदुकधारी लोकांमध्ये पाकिस्तानात खुलेआम फिरताना दिसत आहे. यामुळेच तिला पाकिस्तानमध्ये एवढी ताकद नेमकी कशी मिळाली? असा सवाल केला जातोय.
या नव्या व्हिडीओत ज्योती मल्होत्रा पाकिस्तानच्या लाहोरमधील प्रसिद्ध असलेल्या अनारकली बाजारात फिरताना दिसत आहे. याच वेळी तिच्या आजूबाजूला पाच ते सहा बंदुकधारी दिसत आहेत. ती रस्त्यावर फिरत असताना हे बंदुकधारी तिचे संरक्षण करत आहेत. हाच व्हिडीओ पाहून पाकिस्तानमध्ये तिच्याकडे एवढी ताकद नेमकी कुठून आली, असा सवाल उपस्थित केला जातोय. हा प्रश्न स्कॉटलँडचा यूट्यूबर कॅलम मिल याने उपस्थित केला आहे. मिल हादेखील एक यूट्यूबर असून तो आतपर्यंत पाकिस्तानसह इतर काही देश फिरलेला आहे.
कॅलम मिल याने त्याच्या यूट्यूबवर एक व्हिडिओ शेअर केला आहे. याच व्हिडीओत ज्योती मल्होत्रा आणि तो एकमेकांसमोर आल्याचे दाखवण्यात आले आहे. ज्योतीने त्याच्याशी संवाद केल्याचंही या व्हिडीओत दिसतंय. ज्योतीने मिल याला तू कुठून आलायस असं विचारलंय. तसेच तू याआधी पाकिस्तानात किती वेळा आलायस, असंही तिने विचारलंय. याला उत्तर म्हणून मिल याने मी चार ते पाच वेळा पाकिस्तामध्ये आलेलो आहे, असं सांगितलं. त्यानंतर मी भारतातून आली आहे. कधी वेळ भेटला तर भारतात ये, असं ज्योतीने मिल याला म्हटल्याचं या व्हिडीओत दिसतंय.
हा संवाद झाल्यानंतर ज्योती मल्होत्रा पुढे निघून गेल्याचं दिसतंय. यावेळी तिच्यासोबत पाच ते सहा शस्त्रधारी असल्याचं दिसतंय. याच वेळी कॅलम याने ज्योती मल्होत्रासोबत एवढे सारे शस्त्रधारी का आहेत? असा प्रश्व विचारला आहे. कॅलम याला ज्योती मल्होत्राला पाहून आश्चर्य वाटलेले आहे. या बंदुकांची गरज काय आहे हे मला समजलेले नाही. तिच्या भोवती एकूण सहा जण बंदुक घेऊन उभे आहेत, असं हा यूट्यूबर म्हणताना दिसतोय.
दरम्यान, ज्याती मल्होत्रा सध्या तपास संस्थांच्या ताब्यात आहे. त्यामुळे भविष्यात तिच्या चौकशीतून नेमके काय-काय खुलासे होतात, हे पाहणे महत्त्वाचे ठरणार आहे.
