पुणे, 25 मे (हिं.स.) – वैष्णवी हगवणे यांचे आई वडील आणि समस्त कस्पटे कुटूंबियांची उपमुख्यमंत्री एकनाथ शिंदे यांनी त्यांच्या निवासस्थानी जाऊन भेट घेतली. यावेळी त्यांनी त्यांचे म्हणणे जाणून घेत त्यांचे सांत्वन केले.
हुंडाबळीच्या या प्रकरणात हुंड्याचा मोह आणि त्यातून येणाऱ्या खोट्या प्रतिष्ठेपायी मुलीप्रमाणे असलेल्या सुनेला मारहाण करून तिला आत्महत्येला प्रवृत्त करणाऱ्या हगवणे कुटुंबातील सर्व पाच सदस्यांना पोलिसांनी अटक केली आहे. त्यांना कठोरात कठोर शासन केले जाईल असे शिंदे यांनी सांगितले. तसेच त्यांना मदत करणारे, किंवा त्यांच्या आडून समाजात दहशत माजवणारे, अथवा त्यांचे गुन्हे पाठीशी घालण्यासाठी मदत करणारे कितीही मोठे असले तरीही त्यांची गय केली जाणार नाही असेही स्पष्ट केले. पोटाची मुलगी जाण्याचे दुःख पचवणे हे खरोखरच फार अवघड असते, मात्र तरीही या दुःखातून सावरण्याचा प्रयत्न करावा असे आवाहन शिंदे यांनी वैष्णवीचे वडील अनिल कस्पटे यांना केले.
या प्रकरणी सुरू असलेल्या कारवाईचे तपशील शिंदे यांनी कस्पटे कुटूंबियांकडून जाणून घेतले. तसेच या प्रकरणी लागेल ती सर्व मदत करण्याबाबत आशवस्त केले. यावेळी त्यांनी वैष्णवीचे बाळ आपल्या हातात घेऊन ज्यांनी एवढ्या लहान वयात या मुलाला मायेपासून पारखे केले त्याना नक्की शासन करून या बाळाला न्याय मिळवून देऊ असा विश्वास व्यक्त केला.
यावेळी विधान परिषदेच्या उपसभापती डॉ. नीलम गोऱ्हे, खासदार श्रीरंग बारणे, आमदार विजयबापू शिवतारे आणि समस्त कस्पटे कुटूंबीय उपस्थित होते.
