तेहरान , 27 जून (हिं.स.)।इस्रायल आणि इराणमध्ये युद्धविराम जाहीर झाल्यानंतर इराणचे सर्वोच्च नेते अयातुल्ला अली खामेनी यांनी गुरुवारी(दि.२६) इस्रायलविरुद्धच्यायुद्धात विजयाचा दावा केला आणि म्हटले की, इराणने अमेरिकेला जोरदार थोबाडीत मारली.अमेरिकेने इस्रायलला वाचवण्याचा प्रयत्न केला, पण त्याचा काही उपयोग झाला नाही. अमेरिकेच्या मध्यस्थीने मंगळवारी(दि.२४) लागू झालेल्या युद्धविरामाच्या घोषणेनंतर खामेनी यांनी ही पहिलीच टिप्पणी आहे.
इराणच्या सरकारी दूरचित्रवाणीवर प्रसारित झालेल्या व्हिडिओ संदेशात खामेनी म्हणाले की, इस्लामिक रिपब्लिक विजयी झाला अन् अमेरिकेच्या थोबाडीत मारली. खामेनी यांनी आपल्या भाषणात अमेरिकेच्या मध्यस्थीवरही भाष्य केले. ते म्हणाले, अमेरिकेने हस्तक्षेप केला, कारण त्यांना वाटले की, जर त्यांनी हस्तक्षेप केला नाही, तर झिओनिस्ट राजवट (इस्रायल) पूर्णपणे नष्ट होईल. या युद्धाचा अमेरिकेला काहीच फायदा झाला नाही, असा दावाही त्यांनी यावेळी केला.
१३ जून रोजी युद्ध सुरू झाल्यापासून सर्वोच्च नेते खामेनी यांनी १९ जून रोजी एक व्हिडिओ संदेश जारी केला, परंतु तो त्यांच्या बंकरमधूनच रेकॉर्ड करण्यात आला. त्यानंतर आता गुरुवारी(दि.२६) त्यांनी आणखी एक व्हिडिओ संदेश जारी केला, जो इराणी सरकारी चॅनेल आणि त्यांच्या सोशल मीडिया पेजवर टाकण्यात आला आहे. या व्हिडिओमध्ये त्यांनी इस्रायलवरील विजयाबद्दल आपल्या नागरिकांना अभिनंदन केले आणि हा ऐतिहासिक क्षण असल्याचे म्हटले.
दरम्यान, युद्ध सुरू झाल्यापासून सर्वोच्च नेते खामेनी सार्वजनिक ठिकाणी दिसले नव्हते. इस्रायलने इराणच्या अणु तळांवर हल्ला केल्याने युद्ध सुरू झाले. तेव्हापासून असे म्हटले जात होते की, खामेनी एका गुप्त ठिकाणी लपून बसले आहेत.
