शिमला, 9 सप्टेंबर : हिमाचल प्रदेशातील कुल्लूमध्ये पुन्हा एकदा भूस्खलनामुळे मोठी हानी झाली आहे. आनी विकासखंडातील निरमंडच्या घाटू ग्रामपंचायतीतील शर्मानी गावात मंगळवारी (९ सप्टेंबर) पहाटे सुमारे २.०० वाजता अचानक भूस्खलन झाले. ग्रामपंचायतीचे सरपंच भोगा राम यांनी याची माहिती दिली.
मिळालेल्या प्राथमिक माहितीनुसार, या दुर्घटनेत एकाच कुटुंबातील ५ सदस्य बेपत्ता आहेत, तर घटनास्थळावरून एका व्यक्तीचा मृतदेह सापडला आहे. गावात भीतीचे वातावरण आहे आणि लोक पूर्णपणे घाबरलेले आहेत.
या घटनेची स्थानिक प्रशासनाला माहिती देण्यात आली असून, बचावकार्य वेगाने सुरू आहे. परिसरात सतत पडणाऱ्या जोरदार पावसामुळे परिस्थिती अधिक गंभीर बनली आहे. प्रशासनाने नागरिकांना सुरक्षित ठिकाणी जाऊन राहण्याचे आणि सतर्क राहण्याचे आवाहन केले आहे.
दुर्घटना रात्री उशिरा झाली, जेव्हा लोक घरी झोपलेले होते. भूस्खलनानंतर अनेक लोक मलब्याखाली अडकले होते, त्यांना बचावकार्यातून बाहेर काढण्यात आले आहे. जखमींना जवळच्या निरमंड रुग्णालयात उपचारासाठी हलवण्यात आले आहे. सध्या अजूनही पाच लोक बेपत्ता आहेत आणि त्यांचा शोध घेण्यासाठी शोधमोहीम सुरू आहे. पोलिस प्रशासन, महसूल विभाग, सार्वजनिक बांधकाम विभाग आणि आरोग्य विभागाच्या टीम्स घटनास्थळी पोहोचल्या आहेत.
हवामान विभागाने मंगळवारी (९ सप्टेंबर) कांगडा, शिमला, आणि चंबा भागांमध्ये दुपारी हलक्या पावसाची शक्यता वर्तवली आहे. सकाळपासून आकाशात हलके ढग असल्याचे सांगितले जात आहे. हवामान विभागाने पुढील चार-पाच दिवस हेच हवामान राहील असेही सांगितले आहे.
नैसर्गिक आपत्तींमुळे प्रभावित झालेला चंबा-भरमौर राष्ट्रीय महामार्ग सोमवारपासून (८ सप्टेंबर) छोट्या वाहनांसाठी पुन्हा सुरू करण्यात आला आहे. जोरदार पाऊस आणि भूस्खलनामुळे NH-24 ऑगस्टमध्ये बंद करण्यात आला होता.सोमवारी भाजीपाला, रेशन आणि इतर आवश्यक वस्तूने भरलेल्या अनेक गाड्या चंबामधून भरमौरला नेण्यात आल्या. पुढील दोन दिवसांत हा मार्ग मोठ्या वाहनांसाठी देखील खुला करण्यात येईल.
