– ‘जय महाराष्ट्र’ म्हणत काढला पळ; संजय राऊत व मनसेकडून स्वागत
नवी दिल्ली, 24 जुलै – हिंदी-मराठी वादाचा राग संसदेतही दिसून आला. मराठी भाषेवर टीका करणाऱ्या भाजपा खासदार निशिकांत दुबे यांना काँग्रेसच्या महिला खासदारांनी संसद लॉबीत जाब विचारला. त्यावेळी दुबे यांनी “जय महाराष्ट्र” म्हणत तिथून पळ काढला.
लोकसभेचे कामकाज तहकूब झाल्यानंतर खासदार वर्षा गायकवाड, प्रतिभा धानोरकर व शोभा बच्छाव यांनी दुबे यांना घेरले. त्यांनी विचारले, “तुम्ही महाराष्ट्र व मराठी लोकांविषयी अपमानजनक विधान का केलं?” तसेच “तुमचं वर्तन अयोग्य आहे, आम्ही खपवून घेणार नाही,” असा आक्रमक सवाल केला.
दुबे यांनी यावर, “आप तो मेरी बहन है,” असे म्हणत हात जोडले आणि लॉबीमधून निघून गेले.
वर्षा गायकवाड म्हणाल्या, “निशिकांत दुबे यांना थेट जाब विचारला. ते काही उत्तर देऊ शकले नाहीत. उलट ‘जय महाराष्ट्र’ म्हणत ते निघून गेले.”
या घटनेवर संजय राऊत यांनी प्रतिक्रिया दिली की, “महिला खासदारांनी खरंच हिंमत दाखवली. महायुतीतील खासदारांनी काय केलं?”
मनसे नेते संदीप देशपांडे म्हणाले, “महिला खासदारांनी मराठीचा स्वाभिमान टिकवला, आम्ही त्यांचे स्वागत करतो.”
मनसेचे अविनाश जाधव यांनी सांगितले, “हे धाडस आहे. तीन भगिनींनी जे केलं, त्याचा आम्ही सत्कार करू. पुरुष खासदारांकडून अपेक्षा होती, पण त्यांनी काहीच केलं नाही. या महिला खासदार मराठीसाठी उभ्या राहिल्या, वेळ आली तर आम्ही त्यांच्यासोबत नक्की उभे राहू.”
शेवटी, या घटनेने संसदेत मोठी चर्चा पेटवली असून, आगामी दिवसांत मराठीसंबंधित मुद्द्यांवर संसदेत काय भूमिका घेतली जाते हे पाहणं महत्त्वाचं ठरेल.
